Sanly wideoaragatnaşyk arkaly geçirilýän okuw maslahaty
2021-nji ýylyň 27-nji oktýabrynda Türkmenistanyň Daşary işler ministrliginiň Halkara gatnaşyklary institutynda Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň gurnamagynda sanly wideoaragatnaşyk arkaly “Sanly tehnologiýalar asyrynda maglumatlary ýaýratmagyň hukuk esaslary” atly akuw maslahaty geçirildi. Iki günlük dowam etjek onlaýn okuw maslahatyny Mamuka Andguladze (Gruziýa), Wolfgang Kleýnwehter (Germaniýa) alyp barýar. Habar beriş serişdeleriniň üsti bilen maglumatlary giňişleýin beýan etmek boýunça hem-de maglumat beriş ulgamynda OSCE gatnaşyjy döwletleriň gazanylan tejribeleri bilen tanyşmak maksady bilen geçirilýän okuw maslahatyna Türkmenistanyň Daşary işler ministrliginiň Halkara gatnaşyklary instituty, Magtymguly adyndaky Türkmen Döwlet uniwersiteti, Halkara ynsanperwer ylymlary we ösüş uniwersiteti, “Türkmenistan”, “Esger”, “Adalat” “Nesil”, “Nebit we Gaz” gazetleriniň wekilleri gatnaşýar.
Okuw maslahatynyň dowamynda çykyş edenler maglumat jemgyýetiniň kemala gelmegi bilen onuň global derejede giň gerime eýe bolmagy netijesinde köpçülikleýin habar beriş serişdelerinde internet žurnalistikasynyň peýda bolmagynyň ähmiýetlidigini bellediler. Olar Internetiň sanly giňişliginde täze aragatnaşyk kanallary, köpçülikleýin habar beriş serişdelerinde maglumatlary ýaýratmagyň we köpçülige ýetirmegiň usullarynyň hukuk esaslary barada täsirli çykyşlary etdiler.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.