Birleşen Milletler Guramasynyň Baş Assambleýasynyň 80-nji mejlisiniň gün tertibi boýunça söhbetdeşlik
2025-nji ýylyň 24-nji sentýabrynda Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça ylmy-usulyýet merkezinde Birleşen Milletler Guramasynyň Baş Assambleýasynyň 80-nji mejlisiniň gün tertibi boýunça söhbetdeşlik geçirildi. Bu söhbetdeşlige BMG-niň Adam hukuklary boýunça ýokary komissarlygynyň wekili Ýelena Butowa hem-de institutymyzyň talyplary gatnaşdylar.
Söhbetdeşlikde BMG-niň Baş Assambleýasynyň 80-nji sessiýasynyň halkara syýasatdaky möhüm ähmiýeti aýratyn bellenildi. Myhman çykyşynda BMG-niň gurluşy, şeýle hem döwlet Baştutanlarynyň bu giňişlikdäki çykyşlarynyň dünýä derejesinde parahatçylyk we howpsuzlyk meselelerine täsirini düşündirdi. Söhbetdeşlikde Türkmenistanyň BMG bilen strategik hyzmatdaşlygynyň ähmiýetine aýratyn üns berildi. Türkmenistanyň öňe sürýän halkara başlangyçlarynyň we Baş Assambleýanyň gün tertibine hödürleýän Kararnamalarynyň dünýä jemgyýetçiliginde giň goldaw tapýandygy nygtaldy. Şeýle hem myhman, Türkmenistanyň Prezidentiniň BMG-niň Baş Assambleýasynyň 80-nji sessiýasynda eden çykyşynyň aýratyn ähmiýete eýedigini belläp, ony dolulygyna synlamagy maslahat berdi.
Geçirilýän şeýle söhbetdeşlikler öz täsirliligi bilen tapawutlanyp, talyplaryň arasynda uly gyzyklanma eýe bolýar.
Sara ATALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby.