Russiýa Federasiýasynyň Türkmenistandaky Ilçihanasy tarapyndan türkmen diplomatiýasynyň milli mekdebiniň kitaphanasyna kitap sowgat berildi
Russiýa Federasiýasynyň Türkmenistandaky Ilçihanasy tarapyndan türkmen diplomatiýasynyň milli mekdebiniň kitaphanasyna kitap sowgat berildi
2024-nji ýylyň 3-nji dekabrynda Türkmenistanyň Daşary işler ministrliginiň Halkara gatnaşyklary institutynyň kitaphanasynda bu ýokary okuw mekdebiň kitaphana işgärleri tarapyndan çäre geçirilip, oňa institutyň halkara ykdysady gatnaşyklary fakultetiniň talyplary işjeň gatnaşdylar. Bu çäre Russiýa Federasiýasynyň Ilçihanasy tarapyndan türkmen diplomatiýasynyň milli mekdebine kitaplaryň sowgat berilmegine bagyşlandy.
Dabaranyň dowamynda kitaphananyň işgärleri, hususan-da, Altyn Kuliýewa, Jennet Saparowa we Göwher Ballykowa sowgat berlen kitaplar bilen tanyşdyrdylar. Sowgat edilen kitaplaryň arasynda beýik rus ýazyjylarynyň ajaýyp eserleri, şeýle hem okuw dersler boýunça kitaplar bar.
Çäräniň ahyrynda institutyň Dünýä dilleri kafedrasynyň rus dili mugallymy beýik rus ýazyjysy L.N.Tolstoýyň “Anna Karenina” romany barada gyzykly gürrüňler berdi. Talyplar özlerini gyzyklandyrýan soraglara giňişleýin jogap aldylar.
Şeýle çäreleriň geçirilmegi talyplaryň arasynda okamaga bolan gyzyklanmanyň we kitaba bolan söýgüniň artmagyna uly ýardam berýär.
Jennet SAPAROWA,
Türkmenistanyň Daşary işler ministrliginiň
Halkara gatnaşyklary institutynyň kitaphanaçasy.