BILERMENLER TOPARYNYŇ PLATFORMASYNYŇ TANYŞDYRYLYŞ DABARASY
2024-nji ýylyň 5-nji sentýabrynda Aşgabat şäheriniň “Arçabil”
myhmanhanasynda Merkezi Aziýanyň sebitleýin ekologiki meseleleri boýunça
merkeziniň we ABŞ-nyň Halkara ösüş guramasynyň Suw we daşky gurşaw
boýunça sebitleýin taslamasynyň gurnamagynda Bilermenler toparynyň
platformasyny tanyşdyrmak üçin tegelek stol geçirildi.
Çäräniň esasy maksady suw serişdelerini, daşky gurşawy goramak, howanyň
üýtgemegi we beýleki ugurlar boýunça hünärmenler üçin işlenip düzülen bilim
binýadyny hödürlemekden, şeýle hem Akademiki birleşiklerini platformany
ulanmaga çekmek we ylmy guramalar bilen hyzmatdaşlyk etmek
mümkinçiliklerini ara alyp maslahatlaşmakdan ybarat.
Okuw sapagyna Türkmenistanyň Suw hojalygy baradaky döwlet komitetiniň,
Türkmenistanyň Prezidentiniň ýanyndaky Döwlet gullugy Akademiýasynyň,
Türkmenistanyň Bilim ministrliginiň, Türkmenistanyň Daşky gurşawy goramak
ministrliginiň Çöller, ösümlik we haýwanat dünýäsi milli institutynyň, Durnukly
ösüş boýunça döwletara komissiýasynyň, Halkara guramalarynyň, ABŞ-nyň
Halkara ösüş guramasynyň wekilleri, şeýle hem Türkmenistanyň Daşary işler
ministrliginiň Halkara gatnaşyklary institutynyň, S.A.Nyýazow adyndaky Türkmen
oba hojalyk uniwersitetiniň we ýurdumyzyň beýleki ýokary okuw mekdepleriniň
wekilleri gatnaşdylar.
Duşuşykda gatnaşyjylar 2022-nji ýylda ABŞ-nyň Halkara ösüş guramasynyň
we onuň Suw we daşky gurşaw boýunça sebitleýin taslamasynyň gurnamagynyň
goldawy bilen Merkezi Aziýada döredilen Merkezi Aziýa Bilermenleriň topary
bilen tanyşdylar.
Akademiki birleşikleriň sosial torunyň agzalaryna esaslanyp, Bilermenleriň
topary özüniň düzümini giňeldýär. Häzirki wagtda ol ylym-bilim, döwlet
edaralarynyň we halkara guramalarynyň wekillerini hem-de Merkezi Aziýada
suwuň, energiýanyň we daşky gurşawyň howpsuzlygyny ösdürmek babatda
gyzyklanýan bilermenleri öz içine alýar.
Mundan başga-da, çäräniň dowamynda okuw maksatnamalary we beýleki
materiallar hem-de zerur resminamalar ara alnyp maslahatlaşyldy, olar soňra
ýurdumyz tarapyndan peýdalanyjylar üçin Bilermenler toparynyň platformasynda
çap ediler. Bu bilim çeşmeleri platforma gatnaşyjylaryň arasynda hünär
derejelerini ýokarlandyrmak we özara tejribe alyşmak, durnukly ösüş ugrunda has
netijeli işlemek we hyzmatdaşlyk etmek üçin zerur çeşme bolup çykyş eder.
Merjen DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň mugallymy.