PÝÇ: II möwsümiň 1-nji ýarym final oýny geçirildi
2023-nji ýylyň 27-nji aprelinde Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň alyp barmagynda «Parahatçylygyň ýaş çaparlary» atly akyl-paýhas bäsleşiginiň 2022-2023-nji okuw ýylyndaky II möwsüminiň I ýarym final oýny geçirildi. «Dialog — parahatçylygyň kepili: gadymy eýýamyň diplomatik mirasynda parahatçylyk medeniýeti» atly umumy şygar astynda geçirilýän möwsümiň ýarym final oýunlarynyň temasy «Siwilizasiýalaryň dialogy - adamzat parahatçylygy üçin binýatlyk esasdyr» diýlip atlandyryldy.
Akyl-paýhas bäsleşiginiň II möwsüminiň I ýarym final oýnuna Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Geldimämmedow Taňryguly, Balkan welaýatynyň Balkanabat şäheriniň Jebel şäherçesindäki 8-nji orta mekdebiniň 10-njy synp okuwçysy Nureddinow Weýselhajy, Aşgabat şäheriniň 16-njy orta mekdebiniň 11-nji synp okuwçysy Agahanow Mekan, Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 10-njy synp okuwçysy Serdarowa Güljan, Daşoguz welaýatynyň Daşoguz şäheriniň 24-nji orta mekdebiniň 10-njy synp okuwçysy Bekmedow Anwar, Maýa Kulyýewa adyndaky Türkmen milli konserwatoriýasynyň ýanyndaky ýörite-sazçylyk mekdep internatynyň 11-nji synp okuwçysy Hallyýew Yhlas, Aşgabat şäheriniň 32-nji orta mekdebiniň 11-nji synp okuwçysy Myradow Hezretaly, Aşgabat şäherindäki Türkmenbaşy adyndaky ýöriteleşdirilen umumybilim berýän mekdep internatynyň 11-nji synp okuwçysy Rozyýew Wepa dagy gatnaşdylar.
Akyl-paýhas bäsleşiginiň II möwsüminiň I ýarym final oýnuna «Pähimdarlar geňeşiniň» agzalary hökmünde, ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowa, Türkmenistanyň Ylymlar akademiýasynyň Taryh we arheologiýa institutynyň Arheologiýa bölüminiň müdiri, taryh ylymlarynyň kandidaty Allaguly Berdiýew, türkmen döwlet maliýe institutynyň Jemgyýeti öwreniş ylymlary kafedrasynyň müdiri, taryh ylymlarynyň kandidaty, professor Meretguly Öwlüýägulyýew dagy adalatly eminlik etdiler.
Gyzgalaňly geçen bäsleşigiň jemlerine laýyklykda, Aşgabat şäheriniň 16-njy orta mekdebiniň 11-nji synp okuwçysy Agahanow Mekan, Daşoguz welaýatynyň Daşoguz şäheriniň 24-nji orta mekdebiniň 10-njy synp okuwçysy Bekmedow Anwar, Maýa Kulyýewa adyndaky Türkmen milli konserwatoriýasynyň ýanyndaky ýörite-sazçylyk mekdep internatynyň 11-nji synp okuwçysy Hallyýew Yhlas, Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 10-njy synp okuwçysy Serdarowa Güljan I ýarym final oýnuň ýeňijileri diýlip yglan edildi. Ýeňijiler final oýnuna gatnaşmaga hukuk gazandylar.
Akyl-paýhas bäsleşiginiň bu oýnuna Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti hemaýatkärlik etdiler. Ýeňijiler we bäsleşige gatnaşyjylar hemaýatkärler tarapyndan taýýarlanylan gymmat bahaly ýadygärlik sowgatlary hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary bilen sylaglandylar.
«Parahatçylygyň ýaş çaparlary» atly akyl-paýhas bäsleşiginiň II möwsüminiň I ýarym final oýny «Miras» teleýaýlymy bilen okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
«Parahatçylygyň ýaş çaparlary» atly akyl-paýhas bäsleşiginiň II ýarym final oýny 2023-nji ýylyň 28-nji aprelinde geçiriler.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.
Bu barada şu ýerden hem
okap bilersiňiz:
https://ashgabat.in/2023/04/27/yas-caparlar-finala-tarap/
https://salamnews.tm/section/ylym-bilim/bilim/parahatcylygyn-yas-caparlary-akyl-payhas-baslesiginin-i-yarym-final-oyny-gecirildi-df0132