«PARAHATÇYLYGYŇ ÝAŞ ÇAPARLARY»: III MÖWSÜMIŇ V SAÝLAMA OÝNY GEÇIRILDI
2024-nji ýylyň 17-nji ýanwarynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň III möwsüminiň V saýlama oýny geçirildi. «Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly umumy şygar astynda geçirilýän III möwsümiň V saýlama oýny «Gajar döwletiniň XVIII asyrdaky – XIX asyryň I çärýegindäki halkara gatnaşyklary we daşary syýasaty» diýen tema boýunça geçirildi.
«Parahatçylygyň ýaş çaparlary» atly akyl-paýhas bäsleşiginiň III möwsüminiň V saýlama oýnuna Aşgabat şäherindäki Saparmyrat Türkmenbaşy adyndaky ýöriteleşdirilen umumy bilim berýän mekdep internatynyň 10-njy synp okuwçysy Nurhan Guwanjow, şol mekdebiň 11-nji synp okuwçysy Begenç Wepaýew, Aşgabat şäheriniň dil derslerini çuňlaşdyryp öwredýän 87-nji ýöriteleşdirilen orta mekdebiniň 11-nji synp okuwçysy Maksat Alymbaýew, Ahal welaýatynyň Babadaýhan etrabynyň 17-nji orta mekdebiniň 11-nji synp okuwçysy Gülzada Atajanowa, Lebap welaýatynyň Kerki etrabynyň 35-nji orta mekdebiniň 11-nji synp okuwçysy Gülaýym Bakyýewa, Balkan welaýatynyň Balkanabat şäheriniň Jebel şäherçesiniň 8-nji orta mekdebiniň 11-nji synp okuwçysy Weýselhajy Nureddinow, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Seýitmuhammet Gurbangeldiýew, hem-de Mary welaýatynyň Mary şäherindäki iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 10-njy synp okuwçysy Näzik Kakageldiýewa dagy gatnaşdylar.
Akyl-paýhas bäsleşiginiň III möwsüminiň V saýlama oýnuna «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň Türkmen edebiýaty we edebi gatnaşyklary bölüminiň müdiri, filologiýa ylymlarynyň kandidaty Çary Kulyýew hem-de Magtymguly adyndaky Türkmen döwlet uniwersitetiniň Türkmenistanyň taryhy kafedrasynyň mugallymy Toýly Hommyýew dagy adalatly eminlik etdiler.
Bäsleşik örän çekeleşikli we gyzykly ýagdaýda geçip, onuň netijelerine laýyklykda, sowallara dürs jogap bermekde has tapawutlanan Lebap welaýatynyň Kerki etrabynyň 35-nji orta mekdebiniň 11-nji synp okuwçysy Gülaýym Bakyýewa, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Seýitmuhammet Gurbangeldiýew dagy ýeňiji boldular. Ýeňijiler we bäsleşige gatnaşyjylar hemaýatkärler tarapyndan gymmat bahaly ýadygärlik sowgatlar bilen sylaglandylar. Şeýle-de olara institutyň adyndan Hormat hatlary gowşuryldy.
Bäsleşigiň III möwsüminiň V saýlama oýnuna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Düwmejik» hususy kärhanasy, «Ak menzil» hususy kärhanasy hemaýatkärlik etdiler.
«Parahatçylygyň ýaş çaparlary» atly akyl-paýhas bäsleşiginiň III möwsüminiň V saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen Türkmenistanyň Daşary işler ministrliginiň Halkara gatnaşyklary institutynyň okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
Kakageldi AKMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby,
«Parahatçylygyň ýaş çaparlary» atly
akyl-paýhas
bäsleşiginiň I möwsüminiň ýeňijisi
Bu barada şu ýerde hem okap bilersiňiz: