PARAHATÇYLYGYŇ ÝAŞ ÇAPARLARY: III MÖWSÜMIŇ IV SAÝLAMA OÝNY GEÇIRILDI
2023-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň ýörite karary esasynda döredilen Ýaş diplomatlaryň mekdebiniň guramagynda «Parahatçylygyň ýaş çaparlary» atly akyl-paýhas bäsleşiginiň «Beýik Magtymguly Pyragynyň taglymaty – umumadamzat gymmatlyklarynyň milli şamçyragy» atly umumy şygar astynda geçirilýän III möwsüminiň IV saýlama oýny geçirildi. Bäsleşigiň nobatdaky oýny «Osman imperiýasynyň XVII-XVIII asyrlardaky halkara gatnaşyklary we daşary syýasaty» atly tema bagyşlanyldy. Bäsleşigiň bu oýnuna Saparmyrat Türkmenbaşy adyndaky ýöriteleşdirilen umumy bilim berýän mekdep-internatynyň 11-nji synp okuwçysy Nurgeldi Ataýew, Aşgabat şäheriniň ýöriteleşdirilen 16-njy orta mekdebiniň 11-nji synp okuwçysy Medine Myratberdiýewa, Ahal welaýatynyň Sarahs etrabynyň 1-nji orta mekdebiniň 11-nji synp okuwçysy Atajan Döwletow, Balkan welaýatynyň Balkanabat şäheriniň 17-nji orta mekdebiniň 11-nji synp okuwçysy Kürmämmet Nobatow, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçylary Leýli Ýagşymyradowa we Azat Amansähedow, Daşoguz welaýatynyň Boldumsaz etrabynyň 58-nji orta mekdebiniň 11-nji synp okuwçysy Mahym Püreşowa, Lebap welaýatynyň Kerki etrabynyň 35-nji orta mekdebiniň 9-njy synp okuwçysy Gülbahar Haitowa dagy gatnaşdylar. Bäsleşige «Pähimdarlar geňeşiniň» agzalary hökmünde Türkmenistanyň Daşary işler ministrliginiň Halkara gatnaşyklary institutynyň uly mugallymy, filosofiýa ylymlarynyň kandidaty Begenç Karaýew, Türkmen döwlet maliýe institutynyň uly mugallymy Ahmet Annaberdiýew, Türkmenistanyň Daşary işler ministrliginiň Halkara gatnaşyklary institutynyň uly mugallymy, filologiýa ylymlarynyň kandidaty Baba Saryýew dagy adalatly eminlik etdiler. Bäsleşigiň netijeleri boýunça Aşgabat şäheriniň ýöriteleşdirilen 16-njy orta mekdebiniň 11-nji synp okuwçysy Medine Myratberdiýewa we Balkan welaýatynyň Balkanabat şäheriniň 17-nji orta mekdebiniň 11-nji synp okuwçysy Kürmämmet Nobatow ýeňiş gazanmagy başardylar. Bäsleşige gatnaşyjy okuwçylaryň özlerine berilýän sowallara ýiti zehinlilik, ugurtapyjylyk, ezberlik bilen jogap bermekleri, bu zehinli ýaşlaryň edil miweli agaçlar deýin öz saýlap aljak hünärleri üçin yhlasly zähmet çekip, ezber hem erjel hünärmenler bolup ýetişjekdiklerine, Garaşsyz, baky Bitarap Watanymyza, türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza wepaly, ilhalar ynsanlar bolup ýetişjekdikleriniň kepili boldy.
Bäsleşigiň III möwsüminiň IV saýlama oýnuna Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty, Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Milli ýaý atyjylyk federasiýasy, Türkmenistanyň Senagatçylar we telekeçiler birleşmesi, «Abadan haly» açyk görnüşli paýdarlar jemgyýeti, «Aýdyň gijeler» hojalyk jemgyýeti, «Ýedi dogan» hususy kärhanasy, «Muhammet Balkan» hojalyk jemgyýeti, «Düwmejik» hususy kärhanasy, «Täç hil» hojalyk jemgyýeti, «Ak menzil» hususy kärhanasy hemaýatkärlik etdiler.
«Parahatçylygyň ýaş çaparlary» atly akyl-paýhas bäsleşiginiň III möwsüminiň IV saýlama oýny Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymy bilen Türkmenistanyň Daşary işler ministrliginiň Halkara gatnaşyklary institutynyň okuw studiýasy tarapyndan bilelikde ýazgy edildi. Bäsleşige ýakyn günlerde «Miras» teleýaýlymynda tomaşa edip bilersiňiz.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby,
«Parahatçylygyň ýaş çaparlary» atly akyl-paýhas
bäsleşiginiň
I we II möwsümleriniň ýeňijisi.
Bu barada şu ýerde hem okap bilersiňiz: