«Parahatçylygyň ýaş çaparlary» atly akyl-paýhas bäsleşiginiň IV möwsüminiň saýlama testi geçirildi
2024-nji ýylyň 21-nji sentýabrynda Türkmenistanyň Daşary işler ministrliginiň Halkara gatnaşyklary institutynyň garamagyndaky Ýaş diplomatlaryň mekdebiniň gurnamagynda geçirilýän «Parahatçylygyň ýaş çaparlary» atly akyl-paýhas bäsleşiginiň «Bitarap Türkmenistanyň parahatçylygy dörediji diplomatiýasy: netijeli hyzmatdaşlygyň we durnukly ösüşiň ygtybarly guraly» atly şygar bilen geçirilýän IV möwsüminiň saýlama testi geçirildi. Bu möwsümimiziň beýlekilerden tapawutly tarapy Türkmenistanyň başlangyjy esasynda BMG-niň Baş Assambleýasynyň ýörite kararnamasy bilen “2025-nji ýyl – Halkara parahatçylyk we ynanyşmak ýyly” diýlip yglan edilmegi mynasybetli şeýle şygar bilen atlandyryldy. Bilişimiz ýaly, Gahryman Arkadagymyzyň, Arkadagly Gahryman Serdarymyň baştutanlygynda ylym-bilim babatynda giň mümkinçilikler döredilýär. Munuň aýdyň mysaly hökmünde “Parahatçylygyň ýaş çaparlary”atly akyl-paýhas bäsleşiginiň häzirki wagta çenli III möwsümi jemlenip, olaryň netijeleri boýunça 32 sany ýaş çapar saýlap alan hünärleri boýunça Türkmenistanyň Daşary işler ministrliginiň Halkara gatnaşyklary institutynda okap, kämil bilim alýarlar.
Saýlama testine ýurdumyzyň dürli künjeklerinden 800-den gowrak 10-11-12-nji synplarynyň okuwçylary gatnaşdylar. Bu möwsümde okuwçylar 100 sany test soraglaryna jogap berdiler. Saýlama testiniň soraglary esasanam orta mekdebiniň okuw maksatnamalary esasynda 10-11-12-nji synplarynyň Türkmenistanyň taryhy, dünýä taryhy, Türkmenistanyň medeni mirasy, dünýä medeniýeti hem-de ýaşlaryň daşary ýurt dillerini has içgin özleşdirmekleri üçin iňlis dili, rus dili dersleriden taýýarlanyldy. Şeýle hem zehinli mekdep okuwçylarynyň pikirlenişini barlamak maksady bilen akyl-paýhas, ýagny logiki soraglar hem berildi. Bäsleşigiň geçirilişine wideo-gözegçilik arkaly hem gözegçilik edildi.
Maksat ALYMBAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.