ONLAÝN YLMY–DÖREDIJILIK MASLAHATY GEÇIRILDI
2024-nji ýylyň 14-nji oktýabrynda Magtymguly adyndaky Türkmen döwlet uniwersitetiniň “Medeni miras: geçmişden geljege” ÝUNESKO kafedrasynyň guramagynda “Türkmenistan – ÝUNESKO: taryhy we tebigy ýadygärlikleri goramagyň ileri tutulýan ugurlary” atly onlaýn ylmy-döredijilik maslahaty geçirildi. Oňa Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” ÝUNESKO klubynyň, Aba Annaýew adyndaky Halkara atçylyk akademiýasynyň “Ahalteke atlary – parahatçylygyň ilçileri” ÝUNESKO klubynyň, Myrat Garryýew adyndaky Türkmenistanyň Döwlet lukmançylyk uniwersitetiniň “Dermanlyk ösümliklerimiz – saglygymyz, mirasymyz” ÝUNESKO klubynyň, Türkmen oba hojalyk institutynyň “Daşky gurşawy goramak – durnukly ösüşiň möhüm konsepsiýasy” ÝUNESKO klubynyň, Döwletmämmet Azady adyndaky Türkmen milli dünýä dilleri institutynyň “Parahatçylyk dilleri” ÝUNESKO klubynyň agzalary, professor-mugallymlar we talyp ýaşlar gatnaşdylar. Maslahatda Magtymguly adyndaky Türkmen döwlet uniwersitetiniň uly mugallymy, “Medeni miras: geçmişden geljege” ÝUNESKO kafedrasynyň müdiri, taryh ylymlarynyň kandidaty Bike Diwangulyýewa, Seýitnazar Seýdi adyndaky Türkmen döwlet mugallymçylyk institutynyň dosenti, geografiýa ylymlarynyň doktory, “Durnukly ösüş üçin ekologiýa bilimi” atly ÝUNESKO kafedrasynyň müdiri Röwşen Genjiýew, Türkmenistanyň Ylymlar akademiýasynyň Taryh we arheologiýa institutynyň bölüm müdiri, taryh ylymlarynyň kandidaty Akjagül Nurgeliýewa we başga-da birnäçe professor mugallymlar we hünärmenler özleriniň dürli temadaky işleri bilen täsirli çykyş etdiler. Täsirli geçen onlaýn maslahata biziň institutymyzyň mugallymlary we talyplary işjeň gatnaşdylar.
Maslahatyň dowamynda taryhy we tebigy mirasy gorap saklamak, biodürlilik we tebigy goraghanalar, türkmen halysynyň dünýä medeniýetindäki orny ýaly meseleleriň üstünde içgin durulyp geçildi.
Maslahatyň ahyrynda oňa gatnaşanlar watanymyzy ösüşiň belent sepgitlerine tarap alyp barýan türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň adyna alkyş sözlerini beýan etdiler.
Maksat ALYMBAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.