Okuw-usuly maslahat geçirildi
2024-nji ýylyň 6-njy dekabrynda Türkmen döwlet bedenterbiýe we sport instituty tarapyndan «Pähim-paýhas ummany Magtymguly Pyragy» ýylynda Halkara Bitaraplyk güni mynasybetli ýurdumyzyň ýokary okuw mekdepleriniň žurnalistika hünäri boýunça bilim alýan talyplarynyň gatnaşmagynda «Bitaraplyk owazy ýaňlanyp dur belentde, Watanymyzyň şöhraty ýaş nesilleriň dilinde» atly okuw-usuly maslahaty geçirildi. Bu maslahata Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň mugallymlarydyr talyplary işjeň gatnaşdylar.
Bu okuw-usuly maslahatynda žurnalistika hünäriniň dürli ugurlary boýunça bilim alýan talyp ýaşlaryň arasynda hünär taýýarlygyny kämilleşdirmek we bu ugurda öňdebaryjy halkara tejribeleri öwrenmek babatda pikir alyşdylar. Şeýle hem, Magtymguly adyndaky Türkmen döwlet uniwersitetiniň «Türkmen uniwersiteti», Türkmenistanyň Daşary işler ministrliginiň Halkara gatnaşyklary institutynyň «Ýaş diplomatyň sesi» we Türkmen döwlet bedenterbiýe we sport institutynyň «Talyp sporty» elektron gazetleriniň döredijilik toparlary tejribelerini paýlaşdylar.
Okuw maslahatynyň dowamynda çykyş edenler köpçülikleýin habar beriş serişdeleriniň wekilleriniň hünär derejesini ýokarlandyrmagyň häzirki zaman maglumat jemgyýetiniň talaplaryny ýerine ýetirmekde aýratyn ähmiýetlidigini bellediler. Maslahata gatnaşyjylar žurnalistika hünärinde okaýan talyplaryň bilimini ýokarlandyrmak hem-de köpçülikleýin habar beriş serişdeleriniň wekilleriniň hünär derejesini kämilleşdirmek hakynda täsirli çykyşlary etdiler.
Annagül NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.