MILLILIKLER DÜNÝÄSINE GEZELENÇ
2024-nji ýylyň 2-nji maýynda Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň işjeň agzalary bolan mekdep okuwçylarynyň we talyp ýaşlarynyň gatnaşmagynda Türkmen halysynyň milli muzeýine gezelenç guraldy.
Şeýle hem Türkmenistanyň Daşary işler ministrliginiň Halkara gatnaşyklary institutynyň jemgyýeti Jemgyýeti öwreniş ylymlary kafedrasynyň mugallymy Suraý Akmyradowa hem-de Türkmen halysynyň milli muzeýiniň hünärmenleri, Ýaş diplomatlaryň mekdebiniň agzalary türkmen halysynyň bäş müň ýyllyk taryhyny, ene-mamalarymyzdan miras galan bu mukaddes milliligimiz bolan gözel halylaryň görnüşleri, olara salynýan nagyşlaryň her biriniň atlarynyň manysy dogrusynda özara pikir alyşdylar.
Gezelenjiň dowamynda Türkmen halysynyň milli muzeýiniň hünärmenleri ilki bilen muzeýiň içi bilen tanyşdyryp, ajaýyp sungat eserlerine deňelýän türkmen halylarynyň taryhda öçmejek yz galdyran gymmatlyk hasaplanyp, bu gymmatlyga Gahryman Arkadagymyzyň, Arkadagly Gahryman Serdarymyzyň türkmen halkynyň aýratyn sarpa goýmagy bu ugurda edýän aladalary, bitirýän ägirt uly işleri dogrusynda gürrüň berdiler.
Şeýle gezelençleriň yzygiderli guralmagy türkmen diplomatiýasynyň geljekki wekilleri bolan Ýaş diplomatlaryň mekdebiniň agzalarynyň bilimleriniň, ukyp başarnyklarynyň açylmagyna ýetirýän täsiriniň uludygyny aydyp bu gezelenje gatnaşanlar özleriniň hoşallygyny bildirdiler.
Aýnur HUDAÝBERGENOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnaliatikasy fakultetiniň II ýyl talyby.