Milli mirasa we ylma wepadarlyk: Halkara gatnaşyklary institutynda ylmy-döredijilik maslahaty geçirildi
2026-njy ýylyň 20-nji maýynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasy tarapyndan Türkmenistanyň ýokary okuw mekdepleriniň mugallymlarynyň, Türkmenistanyň Ylymlar akademiýasynyň ylmy işgärleriniň hem-de ýaş ylmy gözlegçileriň arasynda «Mahmyt Zamahşarynyň edebi mirasynyň dil biliminde ähmiýeti» atly ylmy-döredijilik maslahaty geçirildi. Maslahaty Dünýä dilleri kafedrasynyň uly mugallymy M.Atajanowa alyp bardy.
Ylmy-döredijilik maslahaty Mahmyt Zamahşarynyň edebi-lingwistik mirasyny häzirki zaman dilşynaslyk ylmynyň usulyýetleri arkaly gaýtadan seljermek, alymyň ylmy garaýyşlarynyň dünýä medeniýetindäki we Gündogar renessansyndaky ornuny dabaralandyrmak hem-de ýaş gözlegçileriň ylmy-döredijilik ukyplaryny halkara standartlaryna laýyklykda kämilleşdirmek maksadyna bagyşlandy. Maslahatda alymyň «Al-Mufassal», «Esasyl-belaga» we «Mukaddimat-al-Adab» ýaly eserleriniň dünýä dilşynaslygyndaky ähmiýeti, olaryň esasynda ýaş nesilde watançylyk, ynsanperwerlik duýgularyny terbiýelemek meseleleri ara alnyp maslahatlaşyldy. Şeýle hem umumybilim we hünär bilimi maksatnamalary boýunça okatmagyň usulyýetini guramaçylyk-usuly, innowasion-pedagogik, ylmy-usulyýet nukdaýnazardan has-da kämilleşdirmek, ýaş nesliň döredijilik başarnyklaryny ösdürmek ýaly möhüm ugurlara degişli çykyşlar diňlenildi. Çykyşlarda aýratyn-da, «Esasyl-belaga» eseriniň metodologik, leksikografik we frazeologik esaslaryny häzirki zaman lingwokulturologiýa ylmy we daşary ýurt dillerini (arap dilini) okatmagyň döwrebap usulyýeti bilen utgaşdyrmagyň amaly ähmiýetine üns çekildi.
Maslahatyň ahyrynda gatnaşyjylar tarapyndan beýik akyldaryň lingwistik mirasyny okuw gollanmalaryna we elektron sözlüklere ornaşdyrmak barada möhüm teklipler öňe sürüldi we degişli ylmy çözgütler kabul edildi. Gatnaşyjylar ýurdumyzda ylmyň we bilimiň ösmegine, nusgawy mirasymyzyň dünýä ýüzünde dabaralandyrylmagyna yzygiderli goldaw berýän Gahryman Arkadagymyza hem-de Hormatly Prezidentimiz Arkadagly Gahryman Serdarymyza tüýs ýürekden minnetdarlyk bildirdiler.
Guwanç ALIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 2-nji ýyl talyby