Magtymguly Pyragynyň goşgular ýygyndysy ÝUNESKO-nyň sanawyna girizildi
2023-nji ýylyň 23-nji iýunynda Türkmenistanyň Daşary işler ministrliginiň Halkara gatnaşyklary institutynda “Parahatçylyk medeniýeti” ÝUNESKO klubynyň agzalarynyň arasynda Magtymguly Pyragynyň golýazmalar ýygyndysynyň ÝUNESKO-nyň “Dünýä hakydasy” maksatnamasyna girizilmegi bilen baglanyşykly maslahat geçirildi.
Maslahatyň dowamynda nusgawy şahyrymyzyň dünýä nusgalyk setirlerini ýaşlaryň arasynda wagyz etmek barada pikir alyşmalar boldy. Magtymguly Pyragynyň eserleri diňe bir türkmen halky üçin gymmatly bolman, eýsem, bütin dünýäde öz gymmatyny saklaýar. Onuň eserleriniň gadymy nusgalary hem dünýä döwletleriniň muzeýlerinde goralyp saklanýar. Maslahatda akyldar şahyrymyzyň nakyla öwrülen setirlerinde getirilýän ynsanperwerlik, agzybirlik, jebislik, watançylyk häsiýetleri nygtalyp geçildi.
Şahyryň goşgulary her bir ynsanyň ruhy dünýäsine siňip ony adamzat ýaşaýşynyň mazmunyna çuňňur akyl ýetirmäge çagyrýar. ÝUNESKO tarapyndan döredilen Dünýä hakydasy maksatnamasy hem dokumental mirasyň gymmatly resminamalarynyň ýitip gitmezliginiň öňüni almak maksady bilen döredilendir. Magtymguly Pyragynyň goşgular ýygyndysynyň ÝUNESKO-nyň “Dünýä hakydasynyň” sanawyna goşulmagy häzirki döwürde hem bütin dünýäde onuň ähmiýetlidigini habar berýär.
Ogulsuraý TÄŞLIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.