Ildeşlerimiz köpçülikleýin welosipedli ýörişe gatnaşdylar
2023-nji ýylyň 3-nji iýunynda sagdynlygyň we ruhubelentligiň halkara güni — Bütindünýä welosiped güni mynasybetli köpçülikleýin welosipedli ýöriş geçirildi. Ýöriş gözel paýtagtymyzyň günorta-günbatarynda ýerleşýän, Aşgabadyň görküne görk goşýan «Welosiped» binasyndan badalga aldy.
Ir säher bilen «Welosiped» binasynyň daş-töwereginiň mähellesi ýetik boldy. Hormatly Prezidentimiziň göreldesine eýerip, bagtyýar ildeşlerimiz köpçülikleýin welosipedli ýörişe gatnaşdylar. Ýurdumyzda ençeme ýyldan bäri asylly däbe öwrülen welosipedli ýöriş dabarasyna Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyplary hem uly ruhubelentlik bilen goşuldylar.
Bilşimiz ýaly, häzirki wagtda welosiped sporty ekologiýa abadançylygyna we ynsan saglygyny berkitmäge ýardam berýän sportuň meşhur görnüşleriniň biridir. Hormatly Prezidentimiziň: «Welosiped dünýäde ekologiýa taýdan iň arassa, elýeterli we ygtybarly ulag görnüşi hökmünde giňden ulanylýar. Beýleki ulag serişdelerine garanyňda, ony dolandyrmak hem aňsat. Welosiped sporty bolsa sportuň ekologik taýdan arassa we gyzykly görnüşi bolmak bilen, ilatymyzyň beden saglygyny berkitmekde möhüm orny eýeleýär» diýen sözleri sportuň bu görnüşiniň uly ähmiýete eýedigini görkezýär.
Bütindünýä welosiped güni mynasybetli dabaraly welosipedli ýörişler, sport çäreleri ýurdumyzyň ähli welaýatlarynda ýaýbaňlandyryldy. Baýramçylyk dabaralaryna zähmetkeş halkymyz uly höwes bilen işjeň gatnaşdy.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.