III saýlama oýna bagyşlanan umumy okuw sapagy geçirildi
2023-nji ýylyň 20-nji noýabrynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň agzalary üçin «Magtymguly Pyragynyň şygyrlary – terbiýe mekdebi» atly tema boýunça umumy okuw sapagy geçirildi. Nobatdaky umumy okuw sapagyny Magtymguly adyndaky Türkmen döwlet uniwersitetiniň Türkmen edebiýaty kafedrasynyň müdiri, filologiýa ylymlarynyň kandidaty Amannepes Şyhnepesow geçirdi.
Umumy okuw sapagynyň dowamynda halypa mekdep okuwçylaryna beýik akyldar Magtymguly Pyragynyň çuňňur pähim-paýhasa ýugrulan şygyrlarynda edep-terbiýäniň, diplomata mahsus häsiýetleriň çeper beýan edilişi, şahyryň “Ýar gerekdir”, “Janyna degmez”, “Zor bolar”, “Il ýagşy” ýaly goşgularynda watansöýüjilik, ynsanperwerlik barada gürrüň berdi. Geçirilen sapagyň barşynda Ýaş diplomatlaryň mekdebiniň agzalary halypa özleriniň gyzyklanýan soraglaryny berip, gerekli maglumatlaryny öwrendiler. «Parahatçylygyň ýaş çaparlary» atly akyl-paýhas bäsleşiginiň her oýnunyň öň ýanynda şeýle umumy okuw sapaklarynyň geçirilmegi oňa gatnaşýan mekdep okuwçylarynyň bilimleriniň kämilleşmeginde aýratyn ähmiýete eýedir.
Orazjemal ÇARYÝAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.