III AÇYK HALKARA INTERNET EKOLOGIÝA OLIMPIADASY ÜSTÜNLIKLERE BESLENDI
2024-nji ýylyň 5-nji dekabrynda S.A.Nyýazow adyndaky Türkmen oba hojalyk uniwersitetinde ýurdumyzyň we daşary ýurtlaryň ýokary okuw mekdepeleriniň talyplarynyň arasynda III açyk halkara internet ekologiýa olimpiadasy geçirildi.
Halkara bäsleşigiň açylyş dabarasy bu ýokary okuw mekdebiň «Altyn asyr» medeniýet merkeziniň çeper höwesjeňleriniň çykyşlary bilen dowam etdi. Halkara Bitaraplyk gününiň öňüsyrasynda geçirilen dabarada dostlukly halklaryň milli medeniýetini we sungatyny açyp görkezýän aýdym-sazly çykyşlara giň orun berildi.
III açyk halkara internet ekologiýa olimpiadasyna daşary ýurtlaryň 30-synyň, ýagny Azerbaýjan, Awstraliýa, Amerikanyň Birleşen Ştatlary, Belarus Respublikasy, Beýik Britaniýa, Braziliýa, Çehiýa, Eýran Yslam Respublikasy, Fransiýa, Gazagystan, Germaniýa, Günorta Afrika, Günorta Koreýa, Gyrgyz Respublikasy, Hindistan, Horwatiýa, Hytaý Halk Respublikasy, Indoneziýa, Ispaniýa, Kanada, Malaýziýa, Meksika, Müsür, Niderlandlar Patyşalygy, Özbegistan, Pakistan, Russiýa, Täjigistan, Türkiýe, Ýaponiýa döwletleriniň 70-e golaý ýokary okuw mekdebiniň, şeýle hem ýurdumyzyň 25 ýokary okuw mekdebiniň 500 talyby gatnaşdy. Onda populýasiýalaryň ekologiýasy we biosferasy, adam ekologiýasy we häzirki zaman ekologiýa meseleleri, senagat ekologiýasy, ekologik monitoring, ekologiýa kanunçylygy we halkara guramalar bilen baglanyşykly ýumuşlar hödürlendi. Olary ýerine ýetirmek üçin talyp ýaşlara jemi 90 minut wagt berildi. Olimpiada gatnaşan talyplaryň işleri programma üpjünçiligi arkaly bahalandyryldy we toplanan ballaryň jemi boýunça netijeler jemlendi.
Bäsleşige Türkmenistanyň Daşary işler minstrliginiň Halkara gatnaşyklary institutynyň talyplar topary hem gatnaşyp, üstünlikli çykyş etdiler. Halkara olimpiadanyň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň II ýyl talyplary Şyhdurdy Şyhyýew II orna we Taňryguly Geldimämmedow III orna mynasyp bolmagy başardylar. Biz hem öz gezegimizde talyp deň-duşlarymyzy gazanan halkara üstünligi bilen tüýs ýürekden gutlaýarys!
Guwanç SERDAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.