Hindistan – Merkezi Aziýa Gaznasynyň wekilleri bilen geçirilen duşuşyk
2024-nji ýylyň 30-njy martynda Türkmenistanyň Daşary işler ministrliginiň Halkara gatnaşyklary instituty bilen Hindistan – Merkezi Aziýa Gaznasynyň arasynda wideoşekilli maslahat geçirildi. Oňa türkmen tarapyndan Türkmenistanyň Daşary işler ministrliginiň Halkara gatnaşyklary institutynyň rektory we professor-mugallymlary, şeýle-de hindi tarapyndan şol gaznanyň ýolbaşçy düzümi we wekili gatnaşdylar.
Duşuşygyň çäginde gatnaşyjylar Türkmenistanyň Daşary işler ministrliginiň Halkara gatnaşyklary instituty bilen Hindistan – Merkezi Aziýa Gaznasynyň bilelikdäki ylmy monografiki kitabyny çapa taýýarlamak meselesini ara alyp maslahatlaşdylar we netijeli pikir alyşdylar. Şeýle-de duşuşygyň barşynda iki tarap hem tekliplerini hödürlediler. Hususan-da, türkmen tarapyndan bilelikdäki göz öňüne tutulýan işiň gidişini kämilleşdirmek, şol sanda, sanly diplomatiýa boýunça türkmen – hindi okuw merkezini açmak we özara düşünişmek hakynda Ähtnama gol çekişmek ýaly teklipler öňe sürüldi.
Duşuşygyň ahyrynda taraplar öňe sürülen teklipleri we teswirleri oňlap, özara oňyn hyzmatdaşlygyň geljekki osüşine bolan çuňňur gyzyklanmasyny bildirdiler.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň uly mugallymy.