HER BIR SES — PARLAK GELJEGE ÝOL!
2023-nji ýylyň 26-njy martynda ýurt üçin ähmiýetli, halk üçin bähbitli wakalaryň biri — Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň saýlawlary geçirildi. Türkmenistanyň Daşary işler ministrliginiň Halkara gatnaşyklary institutynda ýerleşýän Berkararlyk etrabynyň 2-nji saýlaw uçastogynda hem bu möhüm syýasy çäre ýokary guramaçylyk derejesine eýe boldy.
Demokratik, aýanlyk, açyklyk ýörelgeleri esasynda geçirilen saýlawlar Türkmenistanyň Konstitusiýasynyň hem-de Saýlaw kodeksiniň kadalary esasynda alnyp barlyp, milli kanunlarymyza, halkara kadalara laýyklykda geçirmek üçin ähli şertler döredildi.
Saýlaw çäreleri ir säherden aýdym-sazly dabaralar bilen badalga aldy. Bahar günleriniň hoştap, jana ýakymly säherinde uly joşguna beslenen aýdym-sazlar talyp ýaşlaryň mähriban Diýarymyza bolan buýsanç duýgularyny has-da artdyrdy.
Saýlawlara syn etmek üçin Garaşsyz Döwletleriň Arkalaşygy, Ýewropada Howpsuzlyk we Hyzmatdaşlyk Guramasy ýaly iri halkara guramalarynyň halkara synçylar toparynyň wekilleriniň hem gelendigini bellemek gerek. Myhmanlar duz-çörekli garşylandy.
Berkararlyk etrabynyň 2-nji saýlaw uçastogynda Magtymguly adyndaky Türkmen döwlet uniwersitetiniň hem-de Türkmenistanyň Daşary işler ministrliginiň Halkara gatnaşyklary institutynyň talyp ýaşlary özleriniň mynasyp dalaşgärine işjeň ýagdaýda ses berdiler. Degişli saýlaw uçastogynda saýlawçylaryň 2 müňe golaýy ses berip, syýasy işjeňligini ýene bir gezek aýan etdiler. Saýlaw toparlarynyň agzalary talyp ýaşlaryň saýlaw hukuklarynyň üpjün edilmegine örän jogapkärli çemeleşdiler. Watanymyzyň geljegi bolan gujurly ýaşlarymyz Berkarar döwletiň täze eýýamynyň Galkynyşy döwründe özleriniň ilkinji syýasy ädimlerini ädip, iň mynasyp dalaşgär üçin öz seslerini bermäge mümkinçilik aldylar. Asylly däbe eýerilip, şu gezekki saýlawlara 18 ýaşyny dolduryp, saýlaw uçastoklarynda ilkinji gezek ses berýän talyp ýaşlara Türkmenistanyň Magtymguly adyndaky Ýaşlar guramasynyň adyndan ýadygärlik sowgatlary gowşuryldy. Munuň özi ýurdumyzda ýaş nesle aýratyn üns berilýändiginiň nobatdaky beýany boldy.
Umuman, saýlaw günündäki çäreler milli demokratiýamyzyň has-da dabaralanýandygynyň aýdyň beýanyna öwrülip, häzirki türkmen jemgyýetinde çuň özgertmeleri durmuşa geçirmegiň binýatlyk esaslarynyň üpjün ediljekdiginden nyşandyr.
Goý, döwletimiziň demokratik-hukuk binýady has-da berkesin! Parahat ýurdumyzyň abraý-mertebesini belende galdyrjak, halkymyza mynasyp hyzmat etjek dalaşgärler saýlansyn!
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.