INSTITUTYMYZYŇ TALYPLARY HALKARA OLIMPIADADA BAÝRAKLY ORUNLARA MYNASYP BOLDULAR
Türkmenistanyň Daşary işler ministrliginiň Halkara gatnaşyklary institutynyň talyplary Maliýe howpsuzlygy boýunça VI halkara olimpiadanyň jemleýji tapgyrynda üstünlikli çykyş edip, halkara gatnaşyklar we ykdysadyýet ugurlary boýunça baýrakly orunlara mynasyp boldular.
Gahryman Arkadagymyz Gurbanguly Berdimuhamedowyň başlangyçlary we hormatly Prezidentimiz Serdar Berdimuhamedowyň parasatly ýolbaşçylygy netijesinde ýurdumyzda bilim ulgamyny döwrebaplaşdyrmak, ýaşlaryň giň gözýetimli hünärmenler bolup ýetişmekleri üçin uly mümkinçilikler döredilýär. «Garaşsyz, baky Bitarap Türkmenistan — bedew batly at-myradyň mekany» ýylynda gazanylan bu üstünlikler mukaddes Garaşsyzlygymyzyň 35 ýyllyk baýramyna mynasyp sowgat boldy.
Olimpiadanyň jemleýji tapgyry 2026-njy ýylyň 27-nji sentýabryndan 2-nji oktýabry aralygynda çenli Russiýa Federasiýasynyň Krasnoýarsk şäherindäki Sibir federal uniwersitetinde geçirildi. Oňa dünýäniň 40-dan gowrak ýurdundan 700 töweregi mekdep okuwçysy we talyp gatnaşdy. Çäräniň dowamynda maliýe howpsuzlygynda emeli aň tehnologiýalaryny ulanmagyň mümkinçilikleri hem-de olar bilen baglanyşykly töwekgelçilikler ara alnyp maslahatlaşyldy.
Abraýly halkara bäsleşige Türkmenistandan ýedi ýokary okuw mekdebiniň 10 talyby gatnaşyp, halkara gatnaşyklar, hukuk, ykdysadyýet we maglumat howpsuzlygy ugurlary boýunça bilimlerini synadylar. Bäsleşigiň netijeleri boýunça türkmen talyplarynyň ikisi ýeňiji bolup, altysy baýrakly orunlara mynasyp boldy.
Şolaryň hatarynda institutymyzyň talyby Sahydöwlet Hümmetjumaýew halkara gatnaşyklar ugry boýunça, Dawut Gezerow bolsa ykdysadyýet ugry boýunça baýrakly orunlary eýelediler. Bu netijeler talyplarymyzyň hünär taýýarlygynyň hem-de öz ugurlary boýunça bilimlerini halkara derejede görkezmäge ukyplydyklarynyň aýdyň beýany boldy.
Häzirki zaman sanly ykdysadyýetinde maliýe serişdeleriniň we maglumat ulgamlarynyň kiberhowplardan goralmagy möhüm ähmiýete eýedir. Arkadagly Gahryman Serdarymyzyň ýolbaşçylygynda ýurdumyzda sanly ykdysadyýeti ösdürmek, kiberhowpsuzlygy berkitmek we bu ugurlar boýunça ýaş hünärmenleri taýýarlamak babatda alnyp barylýan işler talyp ýaşlaryň halkara bäsleşiklerde üstünlikli çykyş etmegine ýardam berýär.
Olimpiadanyň dowamynda türkmen talyplary daşary ýurtly deň-duşlary bilen tejribe alyşdylar we dostlukly gatnaşyklary berkitdiler. Şeýle hem olar Bitarap Türkmenistanyň parahatçylyk söýüjilikli syýasaty hem-de ýurdumyzyň gazanan üstünlikleri barada gürrüň berdiler. Talyplarymyzyň baýrakly orunlara mynasyp bolmagy ýaşlaryň bilim almagy üçin döredilýän mümkinçilikleriň we olary taýýarlan mugallymlaryň zähmetiniň netijesidir.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 4-nji ýyl talyby