Hemişelik Bitaraplygymyzyň şanly 30 ýyllygy mynasybetli sergi
2025-nji ýylyň 11-nji dekabrynda Türkmenistanyň Söwda-senagat edarasynyň binasynda ýurdumyzyň hemişelik Bitaraplygynyň şanly 30 ýyllygy mynasybetli iki günlük sergi açyldy. Oňa ministrlikleriň we pudaklaýyn dolandyryş edaralarynyň hünärmenleri, Senagatçylar we telekeçiler birleşmesiniň agzalary, türkmen işewürleri, şeýle hem daşary ýurt kompaniýalarynyň wekilleri gatnaşýarlar.
Sergide Türkmenistanyň Daşary işler ministrliginiň Halkara gatnaşyklary institutynyň talyplary hem işjeňlik görkezýärler. Hususan-da, birnäçe daşary ýurt dillerinden kämil baş çykarýan geljekki halkaraçy hünärmenler degişli pawilýonlarda wekilçilik edip, sergä gatnaşyjylary şu gezekki forumyň aýratynlyklary bilen tanyşdyrýarlar. Serginiň çäklerinde köpçülikleýin habar beriş serişdeleriniň wekilleri üçin ýörite media merkezi hereket edip, bu ýerde žurnalistleriň işlemegi üçin ähli mümkinçilikler döredilendir. Türkmen diplomatiýasynyň milli mekdebinde ýokary bilim alýan geljekki halkaraçy žurnalistler hem media merkezinde makalalary, tele we radiogepleşikleri, reportažlarydyr interwýulary taýýarlap, forumyň ähmiýetini iň ýokary tizlikde şöhlelendirmekde möhüm işleri alyp barýarlar.
Jemläp aýdanyňda, Halkara parahatçylyk we ynanyşmak ýylynda ýurdumyzda we daşary ýurtlarda Türkmenistanyň hemişelik Bitaraplygynyň şanly 30 ýyllygy mynasybetli guralýan dabaralar, sergilerdir forumlar aýratyn many-mazmuna eýe bolýar. Şoňa görä-de, bu sergide Garaşsyz, hemişelik Bitarap Watanymyzda Gahryman Arkadagymyzyň hem-de hormatly Prezidentimiziň tagallalary bilen amala aşyrylýan halkara ähmiýetli başlangyçlaryň hem-de durmuş-ykdysady özgertmeleriň netijeleri aýdyň görünýär.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.