Halkara maýa goýum arbitražy boýunça ýörite okuw sapagy geçirilýär
Hormatly Prezidentimiz Gurbanguly Berdimuhamedow hünärmenleri taýýarlamagyň derejesini ýokarlandyrmak işini kämilleşdirmek boýunça zerur çäreleri görmegiň wajypdygyny belleýär. Häzirki wagtda milli kanunçylygymyzy döwrebaplaşdyrmak, “Döwlet adam üçindir!” diýen şygar bilen geçirilýän durmuş ugurly syýasatyň ygtybarly hukuk binýadyny üpjün etmek ugrunda degişli işler dowam etdirilýär.
Türkmenistanyň Adalat ministrliginiň teklibi esasynda Türkmenistanyň Bilim ministrliginiň we Türkmenistanyň Daşary işler ministrliginiň bilelikde, Halkara maýa goýum arbitražy boýunça ýörite okuwlaryň maksatnamasyna laýyklykda, geçirilýän ýörite okuw sapaklaryna Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň hem-de Halkara ynsanperwer ylymlary we ösüş uniwersitetiniň ýaş hukukçy mugallymlary, hukuk ugry boýunça bilim alýan 4-5-nji ýyl talyp ýaşlary gatnaşýarlar.
2021-nji ýylyň oktýabr – 2022-nji ýylyň maý aýlary aralygynda meýilleşdirilen okuw sapaklaryny, Türkmenistanyň Adalat ministrliginiň hünärmenleri, Maýa goýum jedellerini düzgünleşdirmek boýunça halkara merkezine Türkmenistanyň adyndan bellenen arbitrler, halkara hukukçylar, ýerli hukuk kompaniýalarynyň hukukçylary, tejribeli professor-mugallymlar arkaly türkmen we iňlis dilinde alyp barýarlar.
Halkara maýa goýum arbitražy boýunça geçirilýän okuw sapaklarynda halkara arbitražy doktrinasynyň, halkara we milli hukuk esaslarynyň, Türkmenistanyň tarap bolup gatnaşan halkara arbitraž işleri boýunça gazanylan tejribäniň çuňňur öwrenilmegine gönükdirilen we halkara maýa goýum arbitražynyň hukuk we nazary esaslary barada we halkara arbitraždaky iş ýörediş tertibine bagyşlanyp, onda ýurisdiksiýa, arbitraž seljerişiniň tapgyrlary, tribunalyň döredilmegi, işiň maliýeleşdirilişi, subutnamalaryň jemlenilmegi, kazyýet mejlisine taýýarlanylyş we kazyýet mejlisi ýaly düşünjeler öwrenilýär.
Bu dersiň maksady ýurdumyzda ýaş hukukçylaryň bilimini kämilleşdirmek, hünär derejesini ýokarlandyrmak, ýurdumyzda durmuşa geçirilýän kanunçylyk işleriň binýadynyň has-da berkemegine ýardam etmekdir.
Gülsenem HOMMADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň öwreniji-mugallymy.