“Halkara gatnaşyklary: parahatçylyk dialogynyň medeniýeti” atly III halkara bäsleşigine badalga berildi
2026-njy ýylyň 11-nji maýynda Türkmenistanyň Daşary işler ministrliginiň Halkara gatnaşyklary institutynda “Halkara gatnaşyklary: parahatçylyk dialogynyň medeniýeti” atly III halkara bäsleşigine dabaraly ýagdaýda badalga berildi. Bu abraýly intellektual bäsleşik dünýäniň dürli künjeklerinden gelen zehinli ýaşlary we geljekki diplomatlary bir meýdança jemledi.
Bäsleşigiň açylyş dabarasynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, BMG-niň Ösüş Maksatnamasynyň Türkmenistandaky Hemişelik wekili Narine Saakýa, Hytaý Daşary işler uniwersitetiniň professory, Merkezi Aziýany öwreniş merkeziniň Direktory Zhang Jia, Russiýanyň Patris Lumamba adyndaky Halklaryň dostlugy uniwersitetiniň dosenti, ykdysady ylymlaryň kandidaty Ulýana Mizerowskaýa çykyş edip, bu halkara bäsleşigiň ýaşlaryň özara parahatçylyk dialogy medeniýetinde ukyp-başarnyklaryny kämilleşdirmegine aýratyn goşant goşjakdygy barasynda giňişleýin beýan etdiler.
Bäsleşige daşary ýurtlaryň 9-ysyndan, ýagny Russiýa Federasiýasynyň, Hytaý Halk Respublikasynyň, Beýik Britaniýanyň, Eýran Yslam Respublikasynyň, Gruziýanyň, Gazagystanyň, Özbegistanyň, Täjigistanyň we Gyrgyz Respublikasynyň 13 sany iň abraýly ýokary okuw mekdebinden, şeýle-de, ýurdumyzyň 24 sany ýokary okuw mekdebinden jemi 160-a golaý ýaşlar gatnaşyp, özara bäsleşdiler.
Türkmenistanyň Bilim ministrliginiň we Daşary işler ministrliginiň Halkara gatnaşyklary institutynyň guramagynda geçirilýän bu bäsleşigiň maksady halkara dialog medeniýetini ýaşlaryň arasynda giňden wagyz etmekden ybaratdyr. Talyp ýaşlar bäsleşigiň dowamynda halkara gatnaşyklarynda parahatçylykly dialogyň häzirki zaman usullary, bitaraplyk syýasatynyň ähmiýeti we medeni diplomatiýanyň çylşyrymly meseleleri boýunça öz bilimlerini hem-de ukyplaryny görkezmegi başardylar. Bu bäsleşik diňe bir bilim synagy bolman, eýsem dürli ýurtlaryň ýokary okuw mekdepleriniň arasynda tejribe alyşmak we dostlukly gatnaşyklary berkitmek üçin hem möhüm binýat bolup hyzmat edýär.
Oguldürli GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.