Halkara Bitaraplyk güni mynasybetli ylmy-amaly maslahat geçirildi
2024-nji ýylyň 9-njy dekabrynda Türkmenistanyň Daşary işler ministrliginiň Halkara gatnaşyklary institutynda Halkara Bitaraplyk güni mynasybetli «Halkara gatnaşyklarynda Bitaraplyk syýasaty – nazary we amaly tejribe» atly ylmy-amaly maslahat geçirildi. Maslahat umumy mejlisden we «Türkmenistanyň hemişelik Bitaraplyk syýasaty – sebitde we dünýäde parahatçylygyň we asudalygyň kepili», «Hemişelik Bitaraplyk: parahatsöýüjilik we ynsanperwer gymmatlyklarynyň binýady», «Halkara ykdysady gatnaşyklary ýola goýmakda Türkmenistanyň Bitaraplyk syýasatynyň orny», «Türkmen Bitaraplygy – parahatçylygyň, durnuklylygyň we deňhukukly hyzmatdaşlygyň özeni» atly bölümçelerden ybarat boldy. Maslahata ýurdumyzyň ýokary okuw mekdepleriniň professor-mugallymlary we talyp ýaşlary, şeýle-de ýaş diplomatlaryň mekdebiniň işjeň agzalary bolan mekdep okuwçylary gatnaşdylar.
Ylmy-amaly maslahatda hormatly Prezidentimiziň parasatly baştutanlygynda döwletimiziň alyp barýan daşary syýasatynyň özeninde duran hemişelik Bitaraplyk derejesiniň ähmiýeti aýratyn nygtaldy. Çykyş edenler türkmen halkynyň beýik ynsanperwer ýörelgeleriniň, parahatçylyk söýüji durmuşy pelsepeleriniň gadymyýetden gözbaş alýandygyny buýsanç bilen belläp geçdiler. Ylmy-amaly maslahatynyň ahyrynda oňa gatnaşyjylar dünýäde parahatçylygy, dost-doganlygy, abadançylygy dabaralandyrmak ugrunda taýsyz tagallalary edýän Arkadagly Gahryman Serdarymyzyň, Gahryman Arkadagymyzyň janlarynyň sag, belent başlarynyň aman bolmagyny, tutýan tutumly işleriniň elmydama rowaçlyklara beslenmegini arzuw etdiler.
Şamuhammet ELÝASOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.