«GAHRYMANLARYŇ GAÝDUWSYZLYGY – WATANA WEPALYLYGYŇ BEÝIK NUSGASY» ATLY YLMY-AMALY MASLAHAT GEÇIRILDI
2024-nji ýylyň 6-nji maýynda Türkmenistanyň Daşary işler ministrliginiň Halkara gatnaşyklary institutynda 1941-1945-nji ýyllaryň Beýik Watançylyk urşunda gazanylan Ýeňşiň 79 ýyllygy mynasybetli «Gahrymanlaryň gaýduwsyzlygy – Watana wepalylygyň beýik nusgasy» atly ylmy-amaly maslahaty geçirildi. Maslahata Türkmenistanyň Döwlet, hukuk we demokratiýa institutynyň ylmy işgärleri, Türkmenistanyň Daşary işler ministrliginiň Halkara gatnaşyklary institutynyň we beýleki ýokary okuw mekdepleriniň professor-mugallymlary, talyplary şeýle-de «Ýaş diplomatlar» mekdebiniň işjeň agzalary bolan mekdep okuwçylary gatnaşdylar.
Maslahatyň umumy mejlisinde Türkmenistanyň Döwlet, hukuk we demokratiýa institutynyň ylmy işgäri Meretguly Tangiýew, Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy Oguloraz Eýeberdiýewa, Dünýä dilleri kafedrasynyň mugallymy Enejan Orazmyradowa hem-de Halkara žurnalistikasy fakultetiniň 3-nji ýyl talyby Merjen Aşyrowa dagylar çykyş etdiler.
Ylmy-amaly maslahatyň umumy mejlisinden soň öz işini bölümçelerde dowam etdirdi. «Parahatçylyk, howpsuzlyk we durnukly ösüş – Türkmenistanyň Daşary syýasatynyň esasy ugurlary», «Watansöýüjiligiň filosofiýasynyň dabaralanmagy», «Watan gahrymanlygyň edermenligi – ýaş nesillere görelde» «Beýik ýeňiş – gahrymançylygyň watansöýüjiligiň öçmez nusgasy» atlary bilen geçirilen bölümçelerde Beýik Ýeňşiň, watansöýüjilik ýörelgesiniň, Watan mukaddesliginiň, häzirki zamanda parahatçylyk, howpsuzlyk, ykdysady ösüşleriň ähmiýeti we täsiri barada köp sanly çykyşlar diňlenildi.
Dünýä taryhyna örän pajygaly döwür hökmünde giren 1941-1945-nji ýyllarda hem bu mukaddes kadalara berk eýeren merdana watandaşlarymyz doganlyk halklaryň wekilleri bilen egin-egne berip, aldym-berdimli söweş meýdanlarynda batyrlygyň, Watançylygyň belent nusgasyny görkezdiler, nesilleriň hormatyna mynasyp boldular.
Watanymyzyň azatlygyny, garaşsyzlygyny gorap saklan edermen, gaýduwsyz ata-babalarymyzyň şan-şöhraty halkymyzyň taryhyna girip, ol milli gahrymanlarymyzyň atlary “Hatyra” we “Şöhrat” atly ýadygärlik kitaplarynda ebedileşdirildi.
Nursähet JOMARTOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.