Durnukly ösüş maksatlary boýunça okuw sapaklarynyň nobatdaky tapgyry başlady
Türkmenistanyň Sport we ýaşlar syýasaty ministrliginiň garamagyndaky sport mekdeplerinde Türkmenistanyň Daşary işler ministrliginiň Halkara gatnaşyklary institutynda hereket edýän Durnukly ösüş maksatlary boýunça ylmy-usulyýet merkezi tarapyndan 2020-2021-nji okuw ýyly üçin ylalaşylan okuw maksatnamasyna laýyklykda gurnalýan okuw sapaklarynyň nobatdaky tapgyry başlady. Tapgyryň dowamynda Türkmenistanyň Saglygy goraýyş we derman senagaty ministrliginiň, Türkmenistanyň Bilim ministrliginiň, Türkmenistanyň Hazar deňzi institutynyň, Türkmenistanyň Oba hojalyk we daşky gurşawy goramak ministrliginiň wekilleriniň degişlilikde Durnukly ösüş maksatlarynyň 3-nji, 4-nji, 6-njy we 13-nji maksatlary boýunça çykyşlary meýilleşdirildi.
2021-nji ýylyň 15-nji martynda Sport we ýaşlar syýasaty ministrliginiň garamagyndaky Ýaş olimpiýaçylary taýýarlaýyş mekdebinde Durnukly ösüş maksatlary boýunça ylmy-usulyýet merkeziniň hem-de Türkmenistanyň Saglygy goraýyş we derman senagaty ministrliginiň wekilleriniň we şol mekdebiň mugallymlarynyň, okuwçylarynyň gatnaşmagynda Durnukly ösüş maksatlarynyň 3-nji maksady bolan Sagdyn durmuş we abadançylyk boýunça okuw sapagy geçirildi. Onuň dowamynda jemgyýetde sagdyn durmuş ýörelgesini yzygiderli ýola goýmagyň, bedenterbiýe maşklaryny dowamly ýerine ýetirmegiň, sportuň dürli görnüşleri bilen meşgullanmagyň peýdalary we beýlekiler barada giňişleýin gürrüňdeşlik geçirildi. Şeýle hem, hormatly Prezidentimiziň parasatly ýolbaşçylygynda saglygy goraýyş ulgamynda halkara ähmiýetli alnyp barylýan ägirt uly işler hem-de ýurdumyzyň ähli künjeginde ýaşlaryň sport bilen meşgullanmagy üçin sport mekdepleriň, dynç almak üçin ýörite seýilgähleriň we bu ugra degişli beýleki möhüm desgalaryň ulanmaga tabşyrylandygy barada aýratyn bellenildi. Okuw sapagynyň ahyrynda oňa gatnaşanlar Gahryman Arkadagymyza döredip berýän ajaýyp mümkinçilikleri üçin alkyş sözlerini aýtdylar.
Aýgül MÄTIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.