DURNUKLY ÖSÜŞ MAKSATLARY BOÝUNÇA OKUW SAPAKLARYNYŇ NOBATDAKY TAPGYRLARY ÝOKARY GURAMAÇYLYK DEREJESINDE GEÇIRILDI
Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça ylmy-usulyýet merkezinde 2023-2024-nji okuw ýyly üçin ylalaşylan okuw maksatnamasyna laýyklykda, Birleşen Milletler Guramasynyň Aşgabatdaky wekilhanasy bilen hyzmatdaşlykda Durnukly ösüş maksatlary boýunça okuw sapaklarynyň nobatdaky tapgyrlary ýokary guramaçylyk derejesinde geçirildi. Okuw sapaklarynyň 1-nji tapgyry 2024-nji ýylyň 5-nji fewralynda Aşgabat we Arkadag şäherleriniň çäklerinde ýerleşýän Türkmenistanyň ýokary okuw mekdepleriniň wekilleriniň, 2-nji tapgyry Türkmenistanyň jemgyýetçilik guramalarynyň hem-de medeniýet ulgamynyň wekilleriniň, 3-nji tapgyry 2024-nji ýylyň 27-nji iýunynda dünýä nusgalyk şäher bolan Arkadag şäheriniň 1 ýyllygy mynasybetli ýurdumyzyň köpçülikleýin habar beriş serişdeleriniň wekilleriniň gatnaşmagynda geçirildi.
Okuw sapaklarynyň dowamynda Birleşen Milletler Guramasynyň Aşgabatdaky wekilhanasynyň wekilleri Durnukly ösüş maksatlarynyň ähli 17-si boýunça çykyş edip, häzirki döwürde hormatly Prezidentimiziň parasatly ýolbaşçylygynda ýurdumyzda alnyp barylýan ägirt uly işler, BMG-niň maksatlary we wezipeleri, şäherleri we ilatly ýerleri durnukly ösdürmek, adamlar üçin mynasyp ýaşaýyş şertlerini üpjün etmek wezipeleri we beýlekiler dogrusynda gürrüň etdiler. Şeýle hem dünýä nusgalyk “akylly” we “ýaşyl” tehnologiýalar şäheri bolan Arkadag şäheri, durnukly ösüşi üpjün etmekde ygtybarly we durnukly energiýa ulgamynyň orny, Durnukly ösüş maksatlaryna ýetmek üçin ulagyň ähli görnüşleriniň arabaglanyşygyny berkitmek dogrusynda we bu ugurda Türkmenistan döwletimiziň halkara başlangyçlarynyň we tagallalarynyň ähmiýeti barada bellediler. Okuw sapaklaryna gatnaşanlar degişli şahadatnamalar bilen sylaglandylar.
Kerim BAÝMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby,
Durnukly ösüş maksatlarynyň Ýaş ilçisi.