Dürli dillerde goşgularyň çeper okaýyş duşuşygy
2022-nji ýylyň 30-njy martynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň guramagynda institutyň talyplarynyň arasynda daşary ýurt dillerinde goşgularyň çeper okalyşy guraldy.
Bäsleşige institutymyzyň talyplary işjeň gatnaşdylar. Bäsleşigiň dowamynda talyplar türkmen, iňlis, rus, fransuz, nemes, arap, pars, hytaý we ýapon dillerindäki goşgulary okap, özleriniň daşary ýurt dillerini öwrenmekdäki başarnyklaryny görkezdiler.
Çeper okaýyşyň esasy maksady talyplarda dil we sözleýiş endiklerini ösdürmäge, talyplaryň daşary ýurt dillerini söýüp öwrenmäge, ukyp-başarnyklaryny ýüze çykarmaga, özbaşdak pikirlenmek, işlemek endiklerini artdyrmaga ýardam etdi.
Mälim bolşy ýaly, her bir halkyň dili – bu onuň sözde beýanyny tapan taryhy hakydasy bolup, ol ýa-da gaýry halkyň medeniýetiniň möhüm bölegi we ony beýlekilere ýetirmegiň serişdesidir. Ol adamlaryň dünýägaraýşynyň kemala gelmegine öz täsirini ýetirýär.
Goşgularda esasan-da sözler, çeper we köp manyly ulanylýar. Bu bolsa talyplaryň şol dilleriň ruhuna düşünmeginde uly ähmiýete eýe bolýar. Grammatika we beýleki serişdeler bilen işlenende öwrenilýän diliň goşgularyň üsti bilen ruhuna has-da golaýlaşmak şol dillere ussatlyk bilen erk etmekde uly üstünlige getirýär.
Güljahan GARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby