DÜNÝÄ DEREJELI BÄSLEŞIKDE TALYPLARYMYZYŇ ÜSTÜNLIGI
2026-njy ýylyň 20-nji ýanwarynda, global durnukly logistika we halkara ulag diplomatiýasy ulgamynda dünýä talyplyrynyň arasynda iň abraýly bäsleşikleriň biri bolan “Global Sustainability Supply Chain Student Competition” atly halkara talyplylar bäsleşiginiň netijeleri yglan edildi. Birleşen Milletler Guramasynyň Durnukly Ösüş Maksatlaryna (SDGs) hem-de BMG-niň “Durnukly ulag onýyllygy (2026-2035)” atly başlangyjyna goşant goşmak maksady bilen guralan bu bäsleşik dünýäniň iň güýçli ýokary okuw mekdeplerini bir ýere jemledi.
Bu gezekki global bäsleşige bütin dünýäden 113 sany saýlama topar gatnaşyp, olar real logistika we durnukly önümçilik zynjyrynyň meselelerini çözmek ugrunda üç tapgyrdan ybarat bolan (ýazmaça iş, tanyşdyryş we final çykyşy) gaty çylşyrymly bäsleşik ýoluny geçdiler. Ýaryşyň emin agzalarynyň hatarynda Dünýä Banky (World Bank Group), FIATA we Halkara howa ýük daşama assosiasiýasy (TIACA) ýaly dünýäniň iň iri we abraýly guramalarynyň hünärmenleri ýer aldy.
Şeýle halkara derejeli we örän bäsdeşlikli ýaryşda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň talyplary uly üstünlik gazandylar. Olaryň ABŞ-nyň Rhode Island universitetiniň talyplary bilen bilelikde döreden “Rhode2Ashgabat” atly halkara topary bäsleşigiň iň soňky we iň netijeli tapgyry bolan Final tapgyryna (Final Round) çenli baryp ýetmegi başardylar we ýörite halkara ykrar ediş sertifikaty (Certificate of Recognition) bilen sylaglandylar.
Olimpiadanyň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 3-nji ýyl talyplary Mähri Guzyçyýewa we Dawut Gezerow baýrakly orna mynasyp bolup, medallar we diplomlar bilen sylaglandylar. Talyplarymyza halkara derejesinde institutymyzyň Halkara ykdysady gatnaşyklary fakultetiniň uly mugallymy, fizika-matematika ylymlarynyň kandidaty, Türkmenistanyň ussat mugallymy Gaplan Esenamanow ýolbaşçylyk etdi.
Bu halkara üstünlik Türkmenistanyň ulag diplomatiýasy we durnukly ösüş ugrundaky halkara başlangyçlaryny ýaş nesiller tarapyndan ylmy derejede özleşdirilýändiginiň hem-de ýurdumyzyň ýokary bilim ulgamynyň dünýä derejesindäki abraýynyň aýdyň subutnamasydyr.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 3-nji ýyl talyby