Döredijilik duşuşygy geçirildi
2026-njy ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň guramagynda “Media giňişliginde halkara hyzmatdaşlygy we halypa-şägirtlik mekdebi” atly döredijilik duşuşygy geçirildi.
Döredijilik duşuşygyň açylyşynda dabara gatnaşyjylar institutyň okuw binasynyň foýesinde guralan Merkezi Aziýa ýurtlarynyň we Azerbaýjan Respublikasynyň milli tagamlarynyň, egin-eşikleriniň we talyplaryň hünäri bilen bagly sergisini synladylar. Mälim bolşy ýaly, bu guralýan sergiler medeni diplomatiýany ösdürmegiň esasy guraly bolup, halklary biri-birine ýakynlaşdyrmakda, dost-doganlygy mäkäm berkitmekde uly ähmiýete eýedir. Şol sebäpli sergide daşary ýurt tagamlarynyň çykarylmagy hem dabara gatnaşyjylarda uly gyzyklanma döretdi.
Serginiň barşynda Türkmenistanyň Daşary işler ministrliginiň Halkara gatnaşyklary institutynyň rektory, pedagogika ylymlarynyň kandidaty Gülşat Ýusupowanyň, Strategik barlaglar boýunça ylmy merkeziniň uly ylmy işgäri Bekdurdy Amansaryýewiň, şahyr Gurbanjemal Annakowanyň çykyşlaryna aýratyn orun berildi.
Şeýle-de dabaranyň dowamynda Türkmenistanyň Daşary işleri ministrliginiň Halkara gatnaşyklary institutynyň adyndan KHBS-de işjeň çykyş eden Halkara žurnalistikasy fakultetiniň talyplaryna hormat hatlary we ýadygärlik sowgatlar gowşuryldy.
Dabaranyň ahyrynda ýaňlanan Türkmenistanyň meşhur zenan aýdymçysy Söýli Rejepowanyň şirin aýdymlary dabaranyň täsirini has-da artdyrdy.
Ogulnar GARRYGULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby