Dil we medeni gatnaşyklaryň häzirki zaman halkara hyzmatdaşlygyndaky ornuna bagyşlanan ylmy-amaly maslahat
2026-njy ýylyň 16-njy aprelinde Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň guramagynda «Dil we medeni gatnaşyklaryň häzirki zaman halkara hyzmatdaşlygyndaky orny» atly ylmy-amaly maslahat geçirildi. Maslahata institutyň professor-mugallymlary we talyp ýaşlary gatnaşdylar.
Häzirki zaman halkara gatnaşyklarynda dilleriň ornuny we medeni diplomatiýanyň ähmiýetini ylmy taýdan seljermäge gönükdirilen bu çäre, halkara hyzmatdaşlygynda dil syýasatynyň, terjimeçilik işiniň we medeni gatnaşyklaryň döwrebap usullaryny öwrenmek hem-de bu ugurda tejribe alyşmak maksady bilen gurnaldy. Maslahatyň dowamynda dünýä dillerini öwrenmegiň diplomatik gatnaşyklary ösdürmekdäki ähmiýeti, milli medeni mirasymyzy halkara derejesinde wagyz etmekde dil biliminiň orny, sanly bilim şertlerinde dilleri okatmagyň usulyýeti hem-de talyp ýaşlaryň ylmy-barlag işlerine bolan höwesini artdyrmak ýaly meseleler boýunça dürli dillerde çykyşlar diňlenildi.
Maslahatda institutyň meýletinçi mugallymy M.Gerwiniň «Türkmenistan – Germaniýa: medeni we ynsanperwer gatnaşyklary», Döwletmämmet Azady adyndaky Türkmen milli dünýä dilleri institutynyň arap dili mugallymy D.Baýmyradowyň «Medeni mirasymyzy halkara derejesinde wagyz etmekde arap diliniň orny», Dünýä dilleri kafedrasynyň mugallym-öwrenijisi D.Babahanowanyň «Türkmenistan – Ýaponiýa: medeni we ylym-bilim hyzmatdaşlygynyň möhüm ugurlary» hem-de meýletinçi mugallym J.Tiltonyň «Halkara hyzmatdaşlygynda iňlis diliniň wajyp orny» atly çykyşlary has-da täsirli boldy.
Çäre sorag-jogap alyşmalary bilen dowam etdi. Dünýä dillerini öwrenmegiň halklaryň arasynda dostlukly gatnaşyklary ösdürmekdäki ähmiýeti baradaky täsirli pikirleri diňlän gatnaşyjylar, maslahatyň ahyrynda döredilen mümkinçilikler üçin Arkadagly Gahryman Serdarymyza we türkmen halkynyň Milli Lideri Gahryman Arkadagymyza öz hoşallyklaryny bildirdiler.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallym-öwrenijisi.