Daşky gurşawy goramaga gönükdirilen okuw sapagy
2022-nji ýylyň 23-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Suw diplomatiýasy” ugry boýunça Türkmenistanyň Italiýa Respublikasyndaky Adatdan daşary we Doly ygtyýarly Ilçisi Toýly Kömekowyň, şeýle-de institutyň talyplarynyň gatnaşmagynda okuw sapagy geçirildi.
Hormatly Ilçi Toýly Kömekow okuw sapagynyň dowamynda suwdan netijeli peýdalanmak boýunça iki ýurduň arasynda alnyp barylýan işler barada täsirli gürrüňleri berdi. Şeýle hem daşky gurşawy goramak, tebigata aýawly garamak, nesiller üçin tebigy baýlyklary gorap saklamak, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmek ugrunda eýýäm birnäçe ýyllardan bäri uly işleriň durmuşa geçirilýändigi barada dürli mysallary getirmek arkaly giňişleýin gürrüň berdi. Ýene-de, şu ýylda möhüm ähmiýetli wakalaryň biri bolan Türkmenistan bilen Italiýa Respublikasynyň arasyndaky diplomatik gatnaşyklaryň ýola goýulmagynyň 30 ýyllygy barada nygtady.
Duşuşygyň dowamynda suw diplomatiýasynyň öňünde duran meseleleri çözülende halkara hukugyň umumy kabul edilen kadalaryna laýyklykda, ähli ýurtlaryň bähbitlerini nazara tutmagyň zerurdygy nygtaldy. Türkmenistanyň Italiýa Respublikasyndaky Ilçisi bilen geçirilen duşuşyk talyplaryň suw diplomatiýasy baradaky bilimlerini artdyrmaga uly ýardam berdi.
Maýa GURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.