Bütindünýä statistika güni
Dünýäde her bäş ýyldan bir gezek 20-nji oktýabrda bellenilýän “Bütindünýä statistika güni” öz gözbaşyny 2010-njy ýylyň 3-nji iýunynda geçirilen Birleşen Milletler Guramasynyň Baş Assambleýasynyň 41-nji mejlisinde “Bütindünýä statistika gününi” (World Statistics Day) bellemek barada kabul edilen Karardan alyp gaýdýar. Bu Kararda ösüş üçin ygtybarly statistikalary we görkezijileri ösdürmegiň ähmiýetiniň ululygy görkezilýär.
Bütindünýä statistika gününde dünýädäki statistika edaralarynyň we guramalarynyň işgärleriniň her gün ýerine ýetirýän möhüm işlerine köpçüligiň ünsüni çekmek maksat edinilýär.
BMG-niň Baş Assambleýasynyň karary bilen 2015-nji ýylyň 20-nji oktýabrynda “Maglumatlaryň hilini ýokarlandyrmak, durmuş derejesini ýokarlandyrmak” şygary astynda ikinji Bütindünýä statistika güni bellenildi. 2020-nji ýylyň 20-nji oktýabrynda bellenen üçünji Bütindünýä statistika güni bolsa "Dünýäni ynamdar maglumatlar bilen birleşdiriň!" atly şygar esasynda geçdi.
Birleşen Milletler Guramasynyň statistika topary 1947-nji ýylda döredildi. Soňra statistikanyň ähli ugurlarynda diýen ýaly halkara ülňüleri we görkezmeleri kesgitlenildi. Bu statistika topary hökümetleriň statistiki hasabatlaryny gowulandyrmakda, ýurtlaryň we sebitleriň arasynda görlüp-eşidilmedik derejede maglumatlaryň elýeterliligini we deňeşdirilmegini üpjün etmekde möhüm işleri alyp barýar.
Biziň ýurdumyzda hem Bütindünýä statistika güniniň bellenilip geçilmegine uly ähmiýet berilýär. 2019-njy ýylda Türkmenistanyň statistika baradaky döwlet komiteti tarapyndan “Türkmenistanyň ýyllyk statistik neşiri” atly kitap neşir edildi. Onda Türkmenistanyň 2007 – 2019-njy ýyllardaky durmuş-ykdysady ösüşi barada maglumatlar ýerleşdirilendir.
Gunça HAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
II ýyl talyby.