![Breýn-ring bäsleşigi geçirildi surady](https://iirmfa.edu.tm/images/posts/2_1718787190.webp)
15/06/2024
531
Breýn-ring bäsleşigi geçirildi
Häzirki wagtda ýurdumyz dünýä döwletleri, şol sanda abraýly halkara guramalar bilen köpugurly hyzmatdaşlygy yzygiderli ösdürýär. Bu ugurdan talyplaryň sowatlylygyny artdyrmak, düşünjelerini ösdürmek maksady bilen bäsleşiklerdir olimpiadalar geçirilýär. Ýakynda Türkmenistanyň Daşary işler ministrliginiň Halkara gatnaşyklary institutynda geçirilen «Türkmenistanyň Bütindünýä Söwda Guramasy bilen hyzmatdaşlygy» atly breýn-ring bäsleşigi hem munuň bir mysalydyr. Türkmenistanyň Daşary işler, Bilim, Maliýe we ykdysadyýet ministrlikleriniň bilelikde guramagyndaky bu bäsleşige ýurdumyzyň ýokary okuw mekdepleriniň talyplary gatnaşdylar.
Bäsleşikde Türkmenistan bilen BSG-niň arasyndaky gatnaşyklar, guramanyň döreýiş taryhy, onuň ähmiýeti baradaky sowallar berildi. Munuň üçin 10 sany topar özara bäsleşdi. Jemi 50 soragy çözmek üçin, oňa şonça minut wagt berildi. Emin agzalarynyň gelen netijesine görä, birinji orna Halkara ynsanperwer ylymlary we ösüş uniwersitetiniň talyplar topary mynasyp boldy. Ikinji orny Türkmen döwlet maliýe institutynyň, üçünji orny Telekommunikasiýalar we informatika institutynyň talyplar toparlary eýelediler.
— Bütindünýä Söwda Guramasyna agza bolmak bilen bagly geçirilýän işleriň netijesinde, 2020-nji ýylyň iýulynda Türkmenistana bu guramada synçy hukuk derejesi berildi. 2022-nji ýylyň fewralynda BSG-niň Baş geňeşiniň agza ýurtlary tarapyndan biragyzdan Türkmenistanyň arzasy makullanyp, ýurdumyza goşulýan ýurt, ýagny «işjeň synçy» derejesini bermek barada karara gelindi. Döwletimiziň BSG-ä agza bolmagy bilen bagly işler «Türkmenistanyň daşary ykdysady işini ösdürmegiň 2020 — 2025-nji ýyllar üçin Maksatnamasynda», «Türkmenistanyň 2021 — 2030-nji ýyllar üçin daşary söwda Strategiýasynda», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda» hem-de «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» bellenendir. Ol ýurduň halkara söwda gatnaşyklary ulgamyna goşulyşmagyna, bu gurama agza ýurtlaryň bazarlaryna harytlary we hyzmatlary eksport etmek üçin şertleriň gowulanmagyna, milli ykdysadyýete daşary ýurt maýa goýumlarynyň çekilmegine ýardam eder. Bu babatda talyplaryň arasynda şeýle bäsleşigiň geçirilmegi olaryň bu ugurdaky bilim-düşünjelerini has-da artdyrmaklaryna şert döredýär — diýip, Türkmenistanyň Daşary işler ministrliginiň Halkara gatnaşyklary institutynyň halkara ykdysady gatnaşyklary kafedrasynyň uly mugallymy Perhat Çaryýew gürrüň berdi.
Ýeňijilere diplomlar we Türkmenistanyň Demokratik partiýasynyň, Gyzyl Ýarymaý Milli jemgyýetiniň, Kärdeşler arkalaşyklarynyň Milli merkeziniň ýadygärlik sowgatlary dabaraly ýagdaýda gowşuryldy.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň halkara žurnalistikasy fakultetiniň talyby.
Çeşme: Türkmenistan. - 15.06.2024 // Türkmenmetbugat (turkmenmetbugat.gov.tm)