«Bitaraplyk — türkmen halkynyň ynsanperwerlik ýörelgesi» atly bäsleşik
2021-nji ýylyň 2-nji dekabrynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» gurnagynyň guramagynda institutyň II, III, IV ýyl talyplarynyň we Aşgabat şäheriniň 72-nji orta mekdebiniň okuwçylarynyň gatnaşmagynda hemişelik Bitaraplygymyzyň 26 ýyllyk toýy mynasybetli «Bitaraplyk — türkmen halkynyň ynsanperwerlik ýörelgesi» ady bilen bäsleşik geçirildi.
Bäsleşigiň iňlis we rus dillerinde geçirilmeginiň esasy maksady talyplarda we okuwçylarda dil we sözleýiş endiklerini, seljerme we tankydy pikirlenişini ösdürmekden ybaratdyr. Birnäçe tapgyrdan ybarat bolan bäsleşikde ýaşlar «Türkmenistanyň hemişelik Bitaraplygy» tema boýunça prezentasiýaly çykyş etmek, «Paýhas çeşmesi» kitapdan nakyllary iňlis we rus dillerine terjime etmek, «Öňüni alyş diplomatiýasy» temadan düzme ýazmak ýaly şertler boýunça bäsleşdiler.
Bäsleşigiň netijeleri boýunça Halkara ykdysady gatnaşyklary fakultetiniň talyplary I orna, Halkara žurnalistikasy fakultetiniň talyplary II orna, Halkara gatnaşyklary fakultetiniň talyplary III orna mynasyp boldular.
Güljahan GARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.