«AŞGABAT – AZIÝANYŇ MERJENI» YLMY-AMALY MASLAHAT
2021-nji ýylyň 5-nji aprelinde Türkmenistanyň Daşary işler ministrliginiň Halkara gatnaşyklary institutynda Aşgabat şäheriniň döredilmeginiň 140 ýyllygy mynasybetli «Aşgabat – Aziýanyň merjeni» atly ylmy-amaly maslahat geçirildi. Institutyň Jemgyýeti öwreniş ylymlary kafedrasy tarapyndan gurnalan maslahata Türkmenistanyň Ylymlar akademiýasynyň Taryh we arheologiýa institutynyň alymlary, institutyň professor-mugallymlary we talyplary gatnaşdylar. Maslahaty institutyň Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowa alyp bardy we ol öz çykyşynda hormatly Prezidentimiziň ýolbaşçylygynda paýtagtymyzyň ekologiýa abadançylygyny we howpsuzlygyny üpjün etmekde alnyp barylýan beýik işler dogrusynda belläp geçdi.
Şeýle hem, maslahatyň dowamynda Türkmenistanyň Ylymlar akademiýasynyň Taryh we arheologiýa institutynyň ylmy işgärleri Merdan Nepesow we Atageldi Nepesow, şeýle-de, Halkara gatnaşyklary institutynyň Žurnalistikanyň nazaryýeti we amalyýeti kafedrasynyň mugallymy Jemile Pürjäýewa dagylar çykyş edip, Aşgabat şäheriniň 140 ýyllyk taryhy ösüş ýoly, häzirki döwürde paýtagtymyzyň özboluşly binagärlik keşbini kemala getirmekde alnyp barylýan işler barada gürrüň berdiler.
Laçyn BERDIMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.