Adam hukuklarynyň Ählumumy Jarnamasynyň kabul edilen güni mynasybetli duşuşyk geçirildi
Türkmenistan öz Garaşsyzlygyna eýe bolan ilkinji günlerinden başlap, Adam hukuklarynyň Ählumumy Jarnamasynda berkidilen demokratik hukuklary we azatlyklary ykrar edýändigini we hormatlaýandygyny yglan etdi. Häzirki wagtda ýurdumyz özüni dünýä giňişliginde demokratik jemgyýeti ösdürmäge gyzyklanma bildirýän döwlet hökmünde tanatdy. Mälim bolşy ýaly, 1948-nji ýylyň 10-njy dekabrynda Adam hukuklarynyň Ählumumy Jarnamasy kabul edildi. Şu sene bilen baglanyşykly 2024-nji ýylyň 9-njy dekabrynda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň guramagynda Adam hukuklary hakyndaky Ählumumy Jarnamasynyň kabul edilmeginiň 76 ýyllygy mynasybetli institutymyz bilen hyzmatdaş orta okuw mekdepleriniň okuwçylarynyň gatnaşmagynda Adam hukuklary we Bitaraplygyň hukuk derejesi barada sorag-jogap alyşmak arkaly duşuşyk çäresi geçirildi.
Duşuşykda Merkezi Aziýada parahatçylyk zolagynyň emele gelmeginde sebitiň ýurtlary tarapyndan döredilen köptaraplaýyn hyzmatdaşlygy barada, şeýle-de Türkmenistanyň Konstitusiýasyndan gelip çykýan adamyň esasy hukuklarynyň we azatlyklarynyň ýurdumyzyň ýörite kanunçylyk namalarynda beýan edilmegi dogrusynda gürrüň edildi.
Bagtyýar AGAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.