“Adam hukuklary boýunça okuw maksatnamalarynyň halkara ülňüleri” atly okuw maslahaty geçirildi
2021-nji ýylyň 3-7-nji dekabry aralygynda ýurdumyzda Birleşen Milletler Guramasynyň ösüş Maksatnamasynyň (UNDP) Türkmenistandaky wekilhanasynyň gurnamagynda “Adam hukuklary boýunça okuw maksatnamalarynyň halkara ülňüleri” atly okuw maslahaty geçirildi. Oňa Türkmenistanyň Bilim ministrliginiň, Prezidentiniň ýanyndaky Döwlet gullugy akademiýasynyň, Döwlet, hukuk we demokratiýa institutynyň, degişli ýokary okuw mekdepleriniň , şol sanda Türkmenistanyň Daşary işler ministrliginiň Halkara gatnaşyklary institutynyň professor-mugallymlary gatnaşdylar. Bu maslahat onlaýn görnüşinde geçirildi we her ministrlik we edara öz binasyndan wideo aragatnaşyk arkaly gatnaşdy.
Maslahaty geçirmegiň esasy maksady adam hukuklary boýunça okuw maksatnamalary we gollanmalary taýýarlamak bilen bagly halkara tejribesini paýlaşmakdan ybaratdyr.
Maslahatyň dowamynda oňa gatnaşyjylar adam hukuklary, olary goramak bilen baglanyşykly halkara başlangyçlar, olaryň ähmiýeti barada giňişleýin pikir alyşdylar. Aýdylýan pikirleriň filimleriň üsti bilen görkezilmegi has hem täsirli boldy. Çäräň dowamynda oňa gatnaşyjylar her bir gozgalýan mesele boýunça özara sorag-jogap alyşdylar. Onlaýn okuwda ýokary ýyl talyplary üçin “ Adam hukuklarynyň halkara goragy” atly okuw dersini girizmek barada hem maslahatlaşdylar.
Çärä gatnaşanlaryň nygtap aýtmagyna görä, şeýle maslahatlaryň yzygiderli geçirilmegi ýurdumyzda hukuk biliminiň kämilleşdirilmegine, adam hukuklary boýunça okuw maksatnamalarynyň we gollanmalarynyň taýýarlanmagynda uly ähmiýete eýe bolar.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy hünäriniň 1-nji ýyl talyby.