24-nji oktýabr – Birleşen Milletler Guramasynyň güni
Her ýylyň 24-nji oktýabrynda Birleşen Milletler Guramasynyň döredilen güni Gurama agza döwletler tarapyndan ýokary derejede bellenip geçilýär. BMG adamzady howsala salýan esasy syýasy meseleler bilen meşgullanýan iň iri we halkara gurama hasaplanylýar.
Birleşen Milletler guramasy mundan 78 ýyl ozal döredildi. Türkmenistan döwletimiz 1992-nji ýylyň 2-nji martynda Guramanyň doly hukukly agzasy boldy. Türkmenistan “Açyk gapylar” syýasatyny işjeň durmuşa geçirmek bilen, bu abraýly halkara guramasy hem-de onuň ýöriteleşdirilen agentlikleri bilen parahatçylyk, howpsuzlyk we durnukly ösüş ulgamynda hyzmatdaşlygyny has-da pugtalandyrýar. Türkmenistan we Birleşen Milletler Guramasynyň özara hereketleriniň esasy ugurlary strategik häsiýetli bolup, häzirki wagtda Türkmenistanyň BMG-niň platformasyndaky özara hereketleri ýurduň durmuşynyň dürli ulgamlaryny öz içine alýar.
Ýeri gelende aýtsak, BMG-niň düzümine 193 döwlet agza. Her ýylda BMG-niň güni 20 ¬– 26-njy oktýabr aralygynda geçirilýän Birleşen Milletler Guramasynyň hepdeliginiň çäklerinde bellenilýär. Bu baýramçylyk gününde dürli duşuşyklar, mejlisler, ‘’tegelek stollar’’, sergiler we halkara konsertler giňden ýaýbaňlandyrylýar.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.