ÝYLYŇ ADYNA BAGYŞLANYP GEÇIRILEN ILKINJI OKUW SAPAGY
2025-nji ýylyň 10-njy fewralynda Türkmenistanyň Daşary işler ministrliginiň Halkara gatnaşyklary institutyтda 2024 – 2025-nji okuw ýylynyň ikinji ýarymýyllygynyň ilkinji okuw sapagy «Halkara parahatçylyk we ynanyşmak ýyly» ady bilen geçirildi. Okuw sapagyny institutyň Halkara gatnaşyklary we diplomatiýa kafedrasynyň müdiri, filosofiýa ylymlarynyň kandidaty, taryh ylymlarynyň doktory, professor, Türkmenistanyň Adatdan daşary we Doly ygtyýarly Ilçisi, Türkmenistanyň ussat diplomaty Amangeldi Rahmanow alyp bardy. Okuw sapagyna türkmen diplomatiýasynyň milli mekdebiniň mugallymlarydyr talyp ýaşlary gatnaşdylar.
Ykbalyny diplomatiýa hünärine baglan halypa diplomat Amangeldi Rahmanow ilkinji okuw sapagynyň dowamynda gatnaşyjylara ýurdumyzyň halkara derejesinde alyp barýan hoşniýetli gatnaşyklary, milli diplomatiýanyň taryhy, döwletimiziň öňe sürýän başlangyçlary, bu ugurda ýaş diplomatlaryň öňünde duran möhüm wezipeler dogrusynda gyzykly gürrüňler berdi. Mundan başga-da, hormatly Ilçi ýurdumyzyň başlangyjy esasynda Birleşen Milletler Guramasynyň Baş Assambleýasy tarapyndan ykrar edilen Kararnamanyň esasynda 2025-nji ýylyň «Halkara parahatçylyk we ynanyşmak ýyly» diýlip atlandyrylmagynyň düýp manysy, Gahryman Arkadagymyzyň, Arkadagly Gahryman Serdarymyzyň parasatly baştutanlygynda, bu günki gün alnyp barylýan parahatçylykly, dostlukly, hoşniýetli gatnaşyklar barada aýratyn nygtady.
Okuw sapagynyň ahyrynda oňa gatnaşan talyplar ýurdumyzyň alyp barýan daşary syýasaty, milli diplomatiýamyzyň taryhy barada özlerini gyzyklandyrýan sowallar bilen halypa diplomata ýüzlenip, olara giňişleýin jogap aldylar.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.