“ÝOL HEREKETINIŇ MEDENIÝETI – DURMUŞYŇ ASUDALYGY” ATLY MASLAHAT GEÇIRILDI
2026-njy ýylyň 15-nji sentýabrynda Türkmenistanyň Daşary işler ministrliginiň Halkara gatnaşyklary institutynda her ýylyň sentýabr aýynda geçirilýän “Ýol hereketiniň howpsuzlygy – ömrümiziň rahatlygy” atly biraýlygyň çäklerinde Halkara ykdysady gatnaşyklary kafedrasynyň guramagynda “Ýol hereketiniň medeniýeti – durmuşyň asudalygy” atly maslahat geçirildi. Oňa institutyň Halkara ykdysady gatnaşyklary kafedrasynyň mugallymy Sülgün Nepesowa hem-de Halkara ykdysady gatnaşyklary fakultetiniň talyplar ýaşlary gatnaşdylar.
Maslahatda çykyş edenler islendik zadyň edebiniň bolşy ýaly, ýollaryň hem öz tertip-düzgüniniň, ýerine ýetirilmeli hökmany kadalarynyň bardygy, bulary berjaý etmek ilkinji nobatda, adamyň howpsuzlygy üçin wajypdygy barada aýdyldy. Şu nukdaýnazardan, türkmen halkynyň Milli Lideri Gahryman Arkadagymyzyň başlangyjy bilen 2013-nji ýylda badalga berlen “Ýol hereketiniň howpsuzlygy – ömrümiziň rahatlygy” atly şygar bilen geçirilýän bir aýlygyň dowamynda giň möçberli çäreleriň, wagyz-nesihat duşuşyklaryň yzygiderli geçirilýändigi, ýokary derejede geçirilýän çärelerde her bir raýatyň howpsuzlygyny üpjün etmek, ýol hereketiniň düzgünlerini berjaý etmek barada giňişleýin düşündiriş işleri alnyp barylýandygy barada nygtaldy. Her ýylyň 1-nji sentýabryndan – 30-njy sentýabry aralygynda geçirilýän bu çäreler ýol-ulag hadysalarynyň azalmagyna, raýatlarymyzyň rahat hem-de abadan durmuşyny üpjün etmäge gönükdirilýändigini aýratyn bellediler.
Şeýle-de gadymy Oguz türkmenleriniň guran kerwen ýollary bu gün gara ýola, demir ýola, hat-da howa ýollaryna hem öwrülendigi, hormatly Prezidentimiziň ýurdumyzda ynsan saglygyny, onuň howpsuzlygyny gorap saklamak üçin ägirt uly tagallalary edýändigi, bu ugurda geçirilýän biraýlygyň çärelerine ähli ildeşlerimiziň işjeň gatnaşýandyklary bellenip, her bir adamyň, esasan-da, mekdep okuwçylarynyň we talyp ýaşlaryň köpçülik ýerlerinde we ýol hereketlerinde seresap bolmaklaryny, şahsy howpsuzlygyny üpjün etmegiň düzgünlerini öwrenmekleriniň wajypdygyny aýtdylar.
Şeýle-de ýurdumyzda hereket edýän kanunlar, kodeksler we kadalaşdyryjy hukuknamalar Türkmenistanda ýaşaýan ýaşaýjylaryň bähbitlerine laýyklykda kabul edilýändigi nygtalyp, “Ýol hereketiniň howpsuzlygy hakynda” Türkmenistanyň Kanuny barada giňişleýin maglumat berildi. Kanuna laýyklykda, ýol hereketiniň howpsuzlygyny üpjün etmek her birimiziň borjumyz bolup durýandygy ýatladyldy.
Maslahatyň ahyrynda oňa gatnaşyjylar biraýlygyň dowamynda ýurdumyzyň her bir künjeginde guramaçylykly we özboluşly täsirli çäreleriň, maslahatlaryň geçirilmeginiň ýaşlary terbiýelemekde uly ähmiýetiniň bardygyny bellediler.
Kaýum ZAHYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
2-nji ýyl talyby