Ylym we bilim XXI asyrda
2024-nji ýylyň 7-nji iýunynda Seýitnazar Seýdi adyndaky Türkmen döwlet mugallymçylyk institutynyň guramagynda Ylymlar güni mynasybetli «Ylym we bilim XXI asyrda» atly halkara ylmy maslahat geçirildi.
Garyşyk görnüşinde geçirilen bu halkara maslahata 10-a golaý daşary ýurtlaryň bilim edaralaryndan wekiller, ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň mugallymlary onlaýn arkaly gatnaşdylar.
Umumy mejlis tamamlanandan soň, halkara maslahat öz işini «Ynsanperwer ylymlary», «Pedagogika, psihologiýa we okatmak usulyýeti» hem-de «Tebigy ylymlar, matematika we informatika» ýaly ugurlar boýunça bölümçelerde dowam etdi. Çykyşlarda bu halkara ylmy maslahatyň geljekde ylym-bilim ulgamlarynda halkara hyzmatdaşlygy ösdürmäge mümkinçilik berjekdigine ynam bildirildi.
Umumy mejlisde hem-de bölümçelerde çykyş edenler hormatly Prezidentimiziň parasatly baştutanlygynda ýurdumyzyň halkara abraýynyň barha ýokarlanýandygyny, döwletimizde ýaşlara ylym bilen meşgullanmak üçin giň mümkinçilikleriň döredilýändigini buýsanç bilen belläp geçdiler. Çykyşlarda Türkmenistanyň halkara arenada öňe sürýän düýpli ylmy seljermelere esaslanýan teklipleriniň hem-de başlangyçlarynyň dünýä döwletleri tarapyndan gyzgyn goldanylýandygy aýdylyp geçildi. Ylmy-amaly maslahatyň ahyrynda oňa gatnaşyjylar ýurdumyzda ýaşlar üçin uly işleri durmuşa geçirýän türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar.
Täzegül KULJIKOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.