Ylmy seminar
2021-nji ýylyň 25-nji martynda Türkmenistanyň Daşary işler ministrliginiň Halkara gatnaşyklary institutynda 2021-nji ýylyň “Türkmenistan-parahatçylygyň we ynanyşmagyň Watany” diýlip atlandyrylmagy we Türkmenistanyň Garaşsyzlygynyň şanly 30 ýyllygy mynasybetli Jemgyýeti öwreniş ylymlary kafedrasynyň “Paýhas we parasat” ylmy gurnagynyň “Muhammet Baýram han Türkmeniň döredijiliginiň filosofiýasy: watansöýüjilik, mertlik, ynsanperwerlik, parahatsöýüjilik, ynanyşmak we dost-doganlyk gatnaşyklaryny, milli diplomatiýany ösdürmek” atly ylmy seminar we talyplaryň prezentasiýa bäsleşigi geçirildi. Bu ylmy seminara institutyň professor-mugallymlary, talyplary, şeýle hem Aşgabat şäheriniň 72-nji orta mekdebiniň mugallymlary we okuwçylary gatnaşdylar.
Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowanyň alyp barmagynda geçirilen seminarda Jemgyýeti öwreniş ylymlary kafedrasynyň uly mugallymy Täçnabat Paýtykowa, Halkara gatnaşyklary fakultetiniň 2-nji ýyl talyby Kuwwat Mämmedow we Halkara žurnalistikasy fakultetiniň 3-nji ýyl talyby Laçyn Rahmanowa dagy dürli ylmy temalar bilen çykyş etdiler.
Mundan başga-da, ylmy seminaryň dowamynda 2021-nji ýyl “Türkmenistan-parahatçylygyň we ynanyşmagyň Watany” ýyly diýlip atlandyrylmagy mynasybetli geçirilen prezentasiýa bäsleşiginiň ýeňijileri bolan Halkara žurnalistikasy fakultetiniň 2-nji ýyl talyby Tawus Akjaýewa hem-de Halkara gatnaşyklary fakultetiniň 1-njy ýyl talyby Gülbahar Öwezniýazowa çykyş etdiler. Seminarda edilen çykyşlar oňa gatnaşyjylarda uly täsir galdyrdy.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby