ÝHHG-Türkmenistan hyzmatdaşlygyň ýokary sepgidi
Ýurdumyzda milli bilim ulgamyny hem-de ýokary okuw mekdep ylmyny ösdürmek we dünýä derejesine çykarmak maksady bilen ägirt uly işler alnyp barylýar. Türkmenistan ylym-bilim, hukuk ulgamy şeýle hem ýurdumyzyň ykdysadyýetiniň ähli ugurlaryny ösdürmekde birnäçe halkara guramalar bilen bilelikde giň gerimli hyzmatdaşlyk alyp barýar.
Ýurdumyzyň esasy hyzmatdaşlarynyň biri-de Ýewropada howpsuzlyk we hyzmatdaşlyk guramasy (ÝHHG) bolup durýar. Bu gurama, howpsuzlyk meseleleri bilen meşgullanýan dünýädäki iň uly gurama hasaplanylýar.
Türkmenistan hem bu abraýly guramanyň agzasy bolup durýar. Häzirki wagtda, guramanyň düzümine Ýewropadan, Aziýadan we Demirgazyk Amerikadan 57 döwlet girýär. Guramanyň esasy wezipesi hökmünde giň gerimli hyzmatdaşlyga esaslanyp howpsuzlyga hemmetaraplaýyn çemeleşmekdigini bellemek bolýar.
Türkmenistan Ýewropada howpsuzlyk we hyzmatdaşlyk guramasyna (ÝHHG) agza bolmak barada 1992-nji ýylda Helsinki Jemleýji delilnama gol çekdi. Ýewropada howpsuzlyk we hyzmatdaşlyk guramasynyň (ÝHHG) ýurdumyzdaky merkezi Aşgabat şäherinde 1999-njy ýylyň ýanwar aýynda öz işine başlady. Ýewropada howpsuzlyk we hyzmatdaşlyk guramasy (ÝHHG) ýurdumyza, ÝHHG-niň ýolbaşçylygy we institutlary bilen Türkmenistanyň gatnaşyklarynyň we hyzmatdaşlygynyň giňelmegine,ÝHHG-niň ýörelgelerini we borçnamalaryny Türkmenistanyň ýerine ýetirmegine, şeýle hem mundan beýläkde işiň ähli ugurlary boýunça ÝHHG bilen hyzmatdaşlygyň ösmegine we giňeldilmegine ýardam berýär.
2021-nji ýylyň 6-10 dekabry aralygynda Ýewropada howpsuzlyk we hyzmatdaşlyk guramasynyň ýolbaşçylygynda Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň hem-de Türkmenistanyň içeri işler ministrliginiň institutynyň talyplarynyň we mugallymlarynyň gatnaşmagynda “ Jenaýat derňew işleri geçirilende adam hukuklary babatynda halkara standartlaryny berjaý etmek” atly onlaýn okuw sapagy geçirildi. Okuw sapagyň dowamynda hukuk ylmyna degişli täsirli çykyşlar edildi we talyplar bilen Ýewropada howpsuzlyk we hyzmatdaşlyk guramasynyň agzalarynyň arasynda sorag-jogap alşyldy.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara
hukugy fakultetiniň talyby