ÝHHG-NIŇ AŞGABATDAKY MERKEZINDE MEDIA WE MAGLUMAT SOWATLYLYGY BOÝUNÇA OKUW GEÇIRILDI
2026-njy ýylyň 30-njy sentýabry — 2-nji oktýabry aralygynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkeziniň guramagynda terrorçylyga eltýän zorlukly ekstremizmiň we radikalizmiň öňüni almakda media we maglumat sowatlylygyny ýokarlandyrmak boýunça okuw geçirildi. Okuwa Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň talyplary, Magtymguly adyndaky Ýaşlar guramasynyň wekilleri, Türkmenistanyň Gyzyl Ýarymaý Milli jemgyýetiniň ýaş meýletinçileri hem-de jemgyýetçilik guramalarynyň wekilleri gatnaşdylar.
Okuwyň esasy maksady ýaşlaryň maglumatlara tankydy çemeleşmek we olaryň ygtybarlylygyny barlamak boýunça bilimlerini hem-de başarnyklaryny ösdürmekden ybarat boldy.
Okuwyň dowamynda sanly maglumat gurşawynda ýalan maglumatlaryň ýaýramagy, olaryň jemgyýetçilik pikirine täsiri hem-de zyýanly maglumatlaryň öňüni almak bilen baglanyşykly meseleler ara alnyp maslahatlaşyldy. Şeýle-de sosial ulgamlaryň algoritmleriniň we emeli aň arkaly döredilýän maglumatlaryň ýaýramagyndaky orny barada gürrüň edildi. Amaly sapaklarda gatnaşyjylar internetde maglumatlaryň ilkinji çeşmesini tapmak, dürli çeşmeleri deňeşdirmek we sanly gurallaryň kömegi bilen maglumatlaryň dogrulygyny barlamak usullary bilen tanyşdylar. Emeli aňdan jogapkärçilikli peýdalanmak, şahsy maglumatlary goramak hem-de maglumatlary paýlaşmazdan ozal barlamak meselelerine aýratyn üns berildi.
Okuwyň jemleýji gününde gatnaşyjylar öwrenen usullaryny amaly ýumuşlarda ulanyp, ýalan maglumatlary we myş-myşlary kesgitlemek, ýüze çykýan meseleleriň çözgüdine gönükdirilen başlangyçlary taýýarlamak boýunça pikir alyşdylar. Okuwyň ahyrynda netijeler jemlenildi we gatnaşyjylara şahadatnamalar gowşuryldy.
Humaý HALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň talyby