Ýer şary biziň ählimizi birleşdirýär
Ýer şary biziň umumy öýümizdir. Şoňa görä-de, geljegimiz hakdaky alada hökmünde Ýer şary we daşky gurşaw hakda alada etmelidiris. Arzuwlarymyzyň hasyl bolmagy üçin ilki bilen daş-töweregimizi gurşap alan tebigatymyzy gözelleşdirmelidiris, bilelikde işläp, öz töweregimizde ekologik taýdan arassa dünýäni döretmelidiris. Biz uly ekologik ähmiýetli çärelere işjeň gatnaşmak bilen daşky gurşawy gorap bileris.
1974-nji ýyldan bäri her ýylyň 5-nji iýunynda Daşky gurşawy goramagyň bütindünýä güni dünýäde giňden bellenilip geçilýär. Bu sene ilkinji gezek ‘’Diňe ýeke-täk Ýer şary’’ atly şygar astynda bellenildi. Bu sene mynasybetli dünýäde howanyň plastiki enjamlar zerarly hapalanmagy, dürli önümleriň biparh sarp edilmegi, deňziň joşmagy, azyk howpsuzlygy ýaly meseleleri ara alnyp maslahatlaşmak ýörelgä öwrüldi.
Daşky gurşawy goramaga kömek edip biljek käbir düzgünleriň üstünde durup geçmek isleýärin. Biz bu ugurda önümleri gaýtadan işläp, olary täze arassa görnüşe getirip bileris, suwy tygşytlap, jemgyýetçilik ulaglaryndan peýdalanyp, agaç nahallaryny köp oturdyp bileris. Daşky gurşawy goramagyň iň ygtybarly usullarynyň biri hem agaç nahallaryny ekmekdir. Bag ýetişdirmek üçin köp wagtyňy sarp etmeli bolýar. Siz yssy howada gezelenç eden wagtyňyzda kölege berip biljek agaç hakynda oýlandyňyzmy? Siz bagy-bossanlyk maksatnamalaryny durmuşa geçirmek ugrunda näme işleri etdiňiz? Agaçlar kölege berýärler we howa ýetmezçiligini doldurýarlar. Olar jemgyýeti iýmit we kislorod bilen üpjün edýärler. Tokaýlar biziň planetamyzyň iň esasy bölegini düzmek bilen howany arassalaýarlar. Olar adamzada täze bir güýç berýär hem diysek bolar. Mundan başga-da, durnukly ekologik ösüşi kadalaşdyrmak üçin awtoulaglaryň ýerine welosiped sürüp bileris. Bu ugurda pyýada ýöremek, jemgyýetçilik ulaglaryny ulanmak hem peýdalydyr. Geliň, geljekki nesillerimiziň abadançylygy üçin Ýer şary hakda alada edeliň we ony goralyň!
Amanbagt USSAÝEWA,
Türkmenistanyň Daşary işleri ministrliginiň
Halkara gatnaşyklary institutynyň
Halkara hukugy fakultetiniň talyby.