Ýeňiş güni mynasybetli geçirilen ylmy-amaly maslahat
2021-nji ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynda 1941-1945-nji ýyllaryň Beýik Watançylyk urşunda gazanylan Ýeňiş güni mynasybetli “Beýik Ýeňiş - baky şöhrata beslenen gahrymançylygyň, watansöýüjiligiň we mukaddes kasama wepalylygyň öçmez nusgasy” atly ylmy-amaly maslahat geçirildi. Maslahata institutyň professor-mugallymlary we talyplary gatnaşdylar.
Maslahatyň esasy mejlisiniň dowamynda “Ýaşlary ata Watana wepalylyk ruhunda terbiýelemekde Beýik Watançylyk urşunda gazanylan Ýeňşiň ähmiýeti we ýaşlaryň hukuk medeniýetiniň ösüşi”, “Beýik Watançylyk urşy ýyllarynda radiogepleşikleriň ähmiýeti”, “Ata-babalarymyzyň Beýik Watançylyk urşunda görkezen edermenliginiň ýokary ahlakly ýaşlary terbiýelemekdäki orny”, “Beýik Ýeňşiň ähmiýetini nesilleriň aňyna ýetirmekde sanly ulgamyň orny”, şeýle hem “Mälikguly Berdimuhamedowyň uruş ýyllarynda ýazan ilkinji goşgularynyň terbiýeçilik ähmiýeti” atly temalar boýunça professor-mugallymlar we talyplar çykyş etdiler. Maslahatda çykyş edenler uruş gahrymanlarynyň edermenligine we gaýduwsyzlygyna belent sarpa goýulýandygy, şeýle-de Watana, öz halkyna wepaly hem-de oňa tüýs ýürekden hormat goýýan ýaşlary terbiýelemegiň ähmiýeti dogrusynda çykyş etdiler. Mundan başga-da, maslahatda uruş ýyllarynyň metbugatynda çap edilen makalalaryň, döredilen eserleriň ähmiýeti, şeýle hem Ýeňiş buşlugynyň ilkinji bolup radioda ýaňlanandygy we şol ýyllarda radionyň jemgyýete eden täsiri barada edilen çykyşlar maslahatyň täsirliligini has-da artdyrdy.Ylmy-amaly maslahat öz işini umumy mejlisden soňra üç bölümçede dowam etdi.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.