ÝB-NIŇ MERKEZI AZIÝA ÜÇIN DURNUKLY ENERGETIKA BOÝUNÇA BÄSLEŞIGINIŇ NETIJELERI
2023-nji ýylyň 1-nji aprelinden 19-njy maýy aralygynda Ýewropa Birleşigi Merkezi Aziýanyň ýokary okuw mekdepleriniň talyplarynyň, ýaş alymlarynyň we inženerçilik, energetika, ekologiýa we howany öwrenmek boýunça hünärmenleriniň arasynda “Reels4SustainableEnergy” atly gysga wideorolikleriň sebitleýin bäsleşigine badalga berildi. Bäsleşik «Merkezi Aziýada durnukly energetika gatnaşyklar» (SECCA) taslamasy tarapyndan «Arassa energiýa geçmekligi tizleşdirmek — hasaplary azaltmaga we başarnyklary artdyrmaga geçmek» şygary astynda geçirilýär. Bu bäsleşik energiýany tygşytlamagyň, ekologiki we ykdysady artykmaçlyklaryna, energiýanyň gaýtadan dikeldilýän çeşmelerini ösdürmek zerurlygy barada ilatyň habardarlygyny ýokarlandyrmaga gönükdirildi. Ýaryşa Türkmenistanyň, Gazagystanyň, Täjigistanyň, Gyrgyzystanyň we Özbegistanyň wekilleri gatnaşdylar. Bäsleşigiň jemleri boýunça 6 sany ýeňiji saýlandy. Şol ýeňijileriň arasynda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 3-nji ýyl talyby Rahmangylyç Annageldiýew 1-nji orna mynasyp boldy. Şeýle-de bu ýaryşda Gazagystanyň 4 wekili we Gyrgyzystanyň 1 wekili baýrakly orunlara mynasyp boldylar. Bäsleşigiň 6 sany ýeňijileri energiýanyň gaýtadan dikeldilýän çeşmeleri babatynda we durnukly energetika geçmek boýunça ýewropa tejribesini öwrenmek üçin Ýewropa gitmäge mümkinçilik aldylar.
Berdinyýaz GOŇUROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III talyby.
Şeýle hem bu barada şu ýerden okap bilersiňiz: