Ýaşlary ylma we telekeçilik işlerine çekmek boýunça bäsleşik geçirildi
2023-nji ýylyň 22-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Senagatçylar we telekeçiler partiýasynyň Aşgabat şäher komiteti tarapyndan tehnologik ösüş we bazar gatnaşyklaryna geçilýän döwürde ýaşlaryň giň toparyny telekeçilik işine çekmek boýunça ýaş oýlap tapyjylar bilen “Ösüşe ak ýol” atly ylmy bäsleşik geçirildi. Bu bäsleşige ýurdumyzyň ýokary okuw mekdeplerinden, ýagny Türkmenistanyň Inžener-tehniki we ulag kommunikasiýalary institutynyň, Türkmen döwlet maliýe institutynyň, Türkmen döwlet ykdysadyýet we dolandyryş institutynyň, Döwletmämmet Azady adyndaky Türkmen milli dünýä dilleri institutynyň we Türkmenistanyň Daşary işler ministrliginiň Halkara gatnaşyklary institutynyň talyplary we mugallymlary gatnaşdylar.
Ýaş Alymlar Geňeşleriniň wekilleri startup üçin taslama-teklipleri bilen çykyş etdiler. Bu duşuşyga Türkmenistanyň Senagatçylar we telekeçiler partiýasynyň Aşgabat şäher komitetiniň başlygy, “Export Consulting” hojalyk jemgyýetiniň, “Wabrum.com” internet söwda merkeziniň, “Arzuw News” habar portalynyň, “Maslahatly Çözgüt” hojalyk jemgyýetiniň, “Timar” hojalyk jemgyýetiniň, “Asman Express” hojalyk jemgyýetiniň ýolbaşçylary we hünärmenleri gatnaşdylar. Bäsleşige gatnaşýan talyplar oba-hojalyk, ekologiýa, maliýe ulgamy, halkara söwda we IT tehnologiýalary ugurlary boýunça ýurdumyzyň ykdysady görkezijilerini köpugurly ösdürmek boýunça innowasion teklipleri we taslamalary bilen çykyş etdiler. Ýaşlaryň taslama tanyşdyrylyşyna telekeçiler gowy baha bermek bilen hödürlenen taslamalary kämilleşdirmek boýunça degişli maslahatlaryny berdiler. Häzirki döwürde Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamanyň çäklerinde ýaşlary telekeçilige çekmek barada degişli işleriň alnyp barylýandygyny bellediler.
Güljeren ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.