Ýaş diplomatlaryň mekdebiniň agzalary – türkmen diplomatiýasynyň geljekki wekilleri
2024-nji ýylyň 4-nji noýabrynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň işjeň agzalary bolan mekdep okuwçylarynyň gatnaşmagynda Türkmen diplomatiýasynyň taryhy muzeýine gezelenç guraldy. Mekdep okuwçylary bu ýerde türkmen diplomatiýasynyň şöhratly taryhynyň dürli döwürlerine, Bitarap Watanymyzyň parahatsöýüjilik, hoşniýetli goňşuçylyk, dost-doganlyk ýörelgelerine esaslanýan daşary syýasatyna degişli birnäçe gymmatlyklar bilen ýakyndan tanyşdylar. Şeýle hem gezelençden soňra Ýaş diplomatlaryň mekdebiniň agzalary bolan mekdep okuwçylarynyň gatnaşmagynda «An outstanding person» temasy boýunça ýörite okuw sapagy hem guraldy. Sapagyň dowamynda institutymyzyň professor-mugallymlary mekdep okuwçylaryna giň dünýägaraýyşly, kämil bilimli, päk ahlakly, tanymal şahsyýet bolup ýetişmegiň aýratynlyklary barada giňişleýin gürrüň berdiler. Türkmen diplomatiýasynyň geljekki wekilleri bolan Ýaş diplomatlaryň mekdebiniň agzalarynyň gatnaşmagynda şeýle gezelençlerdir okuw sapaklarynyň yzygiderli guralmagy olaryň watansöýüji, ilhalar ynsanlar bolup ýetişmekleri üçin örän ähmiýetli bolup durýar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.