Ýaş diplomatlaryň mekdebi: zehinli okuwçylar ýüze çykaryldy
Türkmenistanyň Daşary işler ministrliginiň Halkara gatnaşyklary institutynda hereket edýän Ýaş diplomatlaryň mekdebiniň agzalarynyň arasynda iň zehinli ýaşlary ýüze çykarmak maksady bilen, Türkmenistanyň taryhy, dünýä taryhy, türkmen edebiýaty, rus we iňlis dili dersleri boýunça geçirilen test synaglarynyň netijeleri belli boldy. Bu test synaga Aşgabat şäheriniň hem-de Ahal welaýatynyň mekdepleriniň 9-11-nji synp okuwçylarynyň 44-si gatnaşdylar. Olardan Arazjemal Öwezowa, Akhumaý Çaryýewa, Jahan Ýaýlymowa dagylar beýleki gatnaşyjy okuwçylardan tapawutlanmagy başardylar.
Geçirilen test synaglarynyň netijeleri okuwçylaryň Türkmenistanyň we dünýä taryhy, edebiýat hem-de daşary ýurt dilleri boýunça taýynlygynyň ýokarydygyny subut etdi. Şunuň bilen baglylykda, öz ykballaryny diplomatiýa bilen baglamak isleýän ukyply okuwçylarynyň tapawutlananlary Ýaş diplomatlar mekdebiniň guramagynda geçirilýän “Parahatçylygyň ýaş çaparlary” akyl-paýhas bäsleşiginiň I saýlama tapgyrynyň 5-nji oýnuna gatnaşmaga hukuk gazandylar. Munuň özi hormatly Prezidentimiziň ýaşlaryň hemmetaraplaýyn ukyp-başarnyklaryny ýüze çykarmaga we kämilleşdirmäge döredip berýän şertleriniň hem-de atalyk aladalarynyň aýdyň subutnamasy boldy.
Myratbeg BERDIMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.